Álıhan Smaıylov atap ótkendeı, Úkimet aldynda Ulttyq qordan bólinetin transfertterdiń mólsherin azaıtý jáne ony keleshek urpaqqa saqtaý mindeti tur.
«Sondyqtan memlekettik bıýdjettiń kirisin kóbeıtý qajet. Birinshiden, bul maqsatta kedendik jáne salyqtyq ákimshilendirýdi sıfrlandyrý sharalary qabyldanýda. Ekinshiden, biz kóleńkeli ekonomıka deńgeıin tómendetý boıynsha jumys istep jatyrmyz», dedi Premer-mınıstr.
Onyń aıtýynsha, taǵy bir baǵyt – salyq mólsherin, atap aıtqanda, JTS jáne QQS arttyrý.
«Qosylǵan qun salyǵyna keletin bolsaq, ol birinshiden ımporttalǵan taýarlardyń básekege qabilettiligin tómendetedi. Al otandyq taýarlarǵa keletin bolsaq, bizdiń sharýalar qosylǵan qun salyǵyn tólemeıdi. Bul oraıda aýyl sharýashylyǵy ónimderin óńdeıtin kompanııalar 70% mólsherde jeńildik alady. Bul jeńildikter saqtalady. Mıkro jáne shaǵyn bıznes qosylǵan qun salyǵyn tóleýshiler qataryna kirmeıdi», dedi Á.Smaıylov.
Sondyqtan otandyq negizgi azyq-túlik taýarlaryn óndirýshilerge bul eshqandaı keri áser etpeıdi. Sonymen qatar atalǵan shara respýblıkalyq bıýdjet kiristerin shamamen 2 trln teńgege arttyrýǵa múmkindik beredi.
«Onda biz, árıne, Ulttyq qordan tartylatyn transfertti osy kólemde azaıtamyz», dep túıindedi sózin Premer-mınıstr.
