Mártebeli meımandy Májiliste qarsy alǵan spıker qazaq pen majar halyqtarynyń tarıhy tyǵyz baılanysty ekenin atap ótti.
Májilis tóraǵasy eki el arasyndaǵy qarym-qatynas Qazaqstan Prezıdenti men Majarstan Premer-mınıstriniń turaqty kezdesýleri arqasynda strategııalyq áriptestik deńgeıine kóterilgenin aıtty.
Ol Majarstan Úkimetiniń basshysyna eldegi aýqymdy reformalar men saıası júıeni qaıta jańǵyrtý týraly aqparat berdi. Prezıdent Qasym-Jomart Toqaevtyń jańa ekonomıkalyq saıasaty aıasynda 2029 jylǵa qaraı ulttyq ekonomıkanyń kólemin eki esege ulǵaıtý josparlanǵanyna toqtaldy.
Sondaı-aq Erlan Qoshanov «Kúshti Prezıdent – yqpaldy Parlament – esep beretin Úkimet» qaǵıdaty aıasynda Parlamenttiń róli men mártebesi kúsheıgenine nazar aýdardy. Qazirgi shaqyrylym Qazaqstan tarıhynda eń kóppartııaly bolyp otyr. Májilis túrli saıası kózqaras pen kúshterdiń alańyna aınaldy. Áıelderdiń, erekshe qajettilikteri bar adamdardyń jáne jastardyń sany kóbeıdi.
Áńgime barysynda taraptar dostyq toptary arqyly jáne basqa da alańdarda parlamenttik dıplomatııanyń damý keleshegin talqylady.
– Biz Majarstandaǵy áriptestermen túrli halyqaralyq forýmdarda, sonyń ishinde Túrki memleketteri Parlamenttik Assambleıasynyń is-sharalarynda jıi kezdesip turamyz. Bir jyl buryn Majarstan Memlekettik Assambleıasy tóraǵasynyń orynbasary Shandor Lejak Qazaqstanǵa keldi. Májiliste nátıjeli dıalog bolǵan edi, – dedi Erlan Qoshanov.
