Talǵat Lekerov bul tyń kásipti 3 jyl buryn bastapty. Áýelgide YouTube jelisinen qoı júnine kartop egip, alaqandaı jerden táp-táýir ónim alyp otyrǵandardy kórip, bul jańalyqty ózinshe jetildirýdi jón kóredi. Júnge saban qosyp, kartoptan keıin sábiz egýdi qolǵa alypty.
– Bıyl oǵan kóń qosyp, izdenisti ulǵaıta tústim. Sýdy qolmen sebezgiletip qoısańyz jetkilikti, arasy dymqyl tartyp, ylǵal saqtalyp turady. Osyndaı ádispen bıyl 300 kılodaı kartop jınap, tamyz aıynda sábiz egip qoıdym. Az kúnde ony da jınaı bastaımyz. Qyzanaq pen qııardy da osy tásilmen egip otyrmyn. Jún men saban tez shirip, az kúnde kádimgi qara topyraqqa aınalyp shyǵa keledi, – deıdi ol.
Talǵattyń tásiline qyzyǵatyndar kóp. Ásirese, jastar jaǵy esiginiń aldyn kógertip, kerek kezinde aıadaı aýylǵa jańalyq ákelgen keıipkerimizden keńes suraıdy.
Qyzylordaǵa barǵanda qala irgesindegi Sabalaq saıajaıynan marakýııa kóshetin satyp ákelgen Talǵat ony da egip kórdi. Brazılııa topyraǵynda ónip, Azııanyń ońtústik-shyǵysynda, Ońtústik Afrıkada, Aýstralııada, sonaý Gavaı araldarynda órken jaıǵan marakýııańyz Syrdyń jerin jatyrqaǵan joq. «Tek aralarymyz tosyrqap, gúldegen kezinde durys tozańdamaı qaldy», deıdi Talǵat. Úlkendigi taýyq jumyrtqasyndaı jemis salǵan ekzotıkalyq aǵashty aldaǵy ýaqytta erekshe ádispen kútimge almaq.
Qyzylorda
