Túrkııa Prezıdenti atap ótken bir álipbı, Qazaqstan Prezıdenti atap ótken bir tarıh jáne О́zbekstan Prezıdenti atap ótken bir bank, ıaǵnı túrki memleketteri arasyndaǵy yntymaqtastyqtyń myzǵymas negizin quraýǵa septigin tıgizedi. Ortaq álipbı – ıdeologııalyq turǵyda óte mańyzdy qadam. Bizdiń elde latyn álipbıine kóshý týraly bastamalar bolǵan. Ol keıinge shegerilgenimen, jańa serpilis alýy múmkin. Al ortaq tarıhqa kelsek, arhıv materıaldaryn qaıta qaraý – baýyrlas halyqtardyń bolashaq qadamdary úshin eleýli serpilis. Túrki memleketterin qaıta qaraýdy usynýdyń ózi uıymǵa múshe memleketter arasyndaǵy mádenı-gýmanıtarlyq, tarıhı-áleýmettik, ıaǵnı barlyq salada birigýdi kúsheıtetin faktor. Odan keıingi ekonomıkalyq faktor. Bul turǵyda byltyr ótken sammıtte Túrki ınvestısııalyq qory qurylyp, 500 mln dollardaı alǵashqy jarna anyqtalǵan bolatyn. Endi Túrki ınvestısııalyq banki qurylatyn bolsa, bul – osy memlekettegi ınfraqurylymdyq jobalardy qarjylandyrý úshin jańa tetik paıda bolady degen sóz. Bul – elder arasyndaǵy ınvestısııalyq aǵymdy kúsheıtýge mańyzdy qadam. Árıne, Túrkııanyń Ortalyq Azııa memleketterimen, onyń ishinde Qazaqstanmen saýda-ekonomıkalyq qarym-qatynastaǵy úlesi áli de bolsa tómen. Bul jerde Reseı, Qytaı bastamalary, Eýrazııa ekonomıkalyq qaýymdastyǵy nemese «Bir beldeý, bir jol» jobasynyń qarjylarymen salystyrýǵa kelmeıdi. Deı turǵanmen Memleket basshysynyń osy turǵydaǵy zańnamalardy jáne ekonomıkalyq termınderdi, ekonomıkalyq tetikterdi úılestirý bastamasy aldaǵy ýaqytta Túrki memleketteri uıymynyń músheleri arasyndaǵy ekonomıkalyq qarqyndy kúsheıtýge óz septigin tıgizýi múmkin.
Áskerı salada da serpindi seriktestik baıqalady. Byltyrdan beri Qyrǵyz Respýblıkasy túrik «Bayraktar»-yna kóptep tapsyrys berip jatyr. Odan bólek, Ázerbaıjan túrik áskerı qarýlaryn keńinen qoldana bastady. Qazaqstan men О́zbekstan da osy baǵyttaǵy qarym-qatynasty júzege asyryp keledi. Ortalyq Azııa memleketteriniń qatysýymen arnaıy jattyǵýlar ótip jatyr. Aldaǵy ýaqytta ekonomıkalyq yntymaqtastyq ıntegrasııasy kúsheıedi.
Qazbek MAIGELDINOV,
Ulttyq quryltaı múshesi, saıasattanýshy
