Zań otandyq jáne halyqaralyq sarapshylarmen birlesip ázirlengen. Qujat elimizde qoǵamdyq baqylaýdy uıymdastyrýǵa jáne júzege asyrýǵa baılanysty qoǵamdyq qatynastardy retteýge baǵyttalyp otyr.
«Halyqaralyq sarapshylardyń qatysýymen 50-den asa jumys toptarynyń otyrysy ótti. Halyqaralyq tájirıbe barynsha talqylandy», dedi D.Qadyrov. Spıkerdiń aıtýynsha, qoǵamdyq baqylaýdyń negizgi qaǵıdattary retinde zańdylyq, jarııalylyq, ashyqtyq jáne qoǵamdyq baqylaý sýbektileriniń erikti qatysýy men táýelsizdigi bekitilgen. Sondaı-aq qujatta azamattar qoǵamdyq baqylaýdy júzege asyra alatyn qoǵamdyq baqylaý obektileriniń tizbesi aıqyndalǵan. Olarǵa barlyq jergilikti atqarýshy jáne ortalyq atqarýshy organ, sonymen birge kvazımemlekettik sektor, ortalyq jáne jergilikti atqarýshy organdardyń fýnksııalaryn oryndaýshylar, sondaı-aq derbes bilim berý uıymdary kirgen.
Budan bólek, zańda qoǵamdyq baqylaýǵa qatysý sharttary da aıqyndalǵan. Qoǵamdyq baqylaýdy iske asyrýǵa 18 jasqa tolmaǵan, ótelmegen sottylyǵy bar, narkologııalyq nemese psıhonevrologııalyq dıspanserde esepte turǵan adamdar jiberilmeıdi.
Aıta ketý kerek, Qoǵamdyq baqylaý jáne ákimshilik rásimder máseleleri boıynsha elimizdiń 3 kodeksi jáne 10 zańyna ózgerister engizildi. Qazir osy zańdardy iske asyrýǵa baǵyttalǵan 16 normatıvtik quqyqtyq akti daıarlanyp, quzyretti memlekettik organdarmen kelisý júrgizilip jatyr. Sonyń ishinde Petısııa ınstıtýty zańmen rettelgen alǵashqy platforma bolǵaly otyr. Zańda otandastarymyzdyń elektrondy formatta jáne jazbasha túrde de petısııa berý múmkindikteri qarastyrylmaq.
«Ákimshilik-rásimdik kodekste petısııa berý jáne qaraýdyń rásimderi jeke qosymshamen retteledi. Respýblıkalyq basqarý nysanyn, ákimshilik-aýmaqtyq qurylymy jáne shekaralardy ózgertý, sot tóreligi, raqymshylyq, Ulttyq qaýipsizdik jáne basqa máseleler boıynsha petısııalar berýge múmkindik bolmaıdy», dep naqtylady D.Qadyrov. Sondaı-aq petısııalardy qaraý tártibine de toqtalyp ótken ol: «Petısııany aýdandyq jerde qarastyrý úshin 2,5 myń adamnyń qoldaýy kerek bolady. Al Úkimet qaraıtyn bolsa, ol jerde 50 myńnan asa qoldaýshysy bolýy kerek. Petısııany qaraý barysynda memlekettik organ birqatar is-shara júrgizip, jumys toptaryn qurady. Qoǵamdyq talqylaý jasaıdy. Halyqaralyq tájirıbeni zerdeleıdi. Sodan keıin sheshim shyǵarady», dedi. Bul rette petısııa boıynsha sheshimdi memlekettik organnyń birinshi basshysy ǵana bere alady. Alaıda qajetti qoldaý kólemin jınaı almaǵan petısııalar da nazardan tys qalmaıdy. Onyń aıtýynsha, shekti mánge jetpegen petısııalar úndeý retinde qarastyrylyp, ákimshilik-rásimdik kodeks boıynsha qaralmaq.
