Aýqymdy jıynǵa Premer-mınıstrdiń orynbasary Tamara Dúısenova, Oqý-aǵartý birinshi vıse-mınıstri Natalıa Jumadildaeva, NIS basqarma tóraǵasy Ánýar Janǵozın, «Qazaqstan halqyna» qoǵamdyq qory basqarma tóraǵasynyń orynbasary Lázzat Shyńǵysbaeva, Bilim berý salasyn turaqty damytý qorynyń dırektory Danııar Toqtarbaev jáne pedagogter qatysty.
Konferensııanyń ashylýynda sóz alǵan Tamara Dúısenova bilim salasynda keıingi jyldary iske asyrylyp jatqan baǵdarlamalarǵa toqtalyp, aýyldardy damytýǵa arnalǵan jobaǵa sáttilik tiledi.
– Bilim sapasyn kóterý maqsatynda qazir eldegi úzdik mektepterdiń tájirıbesin ózge bilim mekemelerine taratý isi júrgizilip jatyr. Onyń ózeginde «Aýyldyq jerlerde tirek mektepterdiń áleýetin damytý» jobasy tur. Qazirde oǵan 80 mektep qatysyp jatyr. Ekinshi kezeńde 200-ge tarta bilim oshaǵy qamtylady, – dedi Premer-mınıstrdiń orynbasary.
«Nazarbaev zııatkerlik mektepteri» DBBU basqarma tóraǵasy Á.Janǵozın 330-dan asa aýyl muǵaliminiń basyn qosqan aýqymdy konferensııanyń mańyzyn atap ótip, jobanyń ulttyq deńgeıde iske asyrylýyna qoldaý bildirgen seriktesterge alǵysyn bildirdi.
– Eki kúndik halyqaralyq konferensııanyń mańyzy erekshe. О́ıtkeni shara aıasynda spıkerler tek bilim berýge ǵana emes, tárbıe úderisine, oqýshylardyń áleýmettik jaǵdaıyna qatysty máselelerdi talqylaıdy. Bıylǵy oqý jylynan bastap 80 aýyldyq mekteppen Nazarbaev zııatkerlik mektepteri tyǵyz baılanys ornatyp jatyr. Búgingi is-shara sol jumystardyń jalǵasy, – dedi Á.Janǵozın.
Uıymdastyrýshylardyń dereginshe, qazir joba aıasynda 2 400-ge jýyq pedagog biliktiligin arttyrǵan. Sonyń nátıjesinde pedagogterdiń kásibı senim deńgeıi 15 paıyzǵa ósken. Al tirek mektepterdegi oqýshylardyń sabaqty meńgerý kórsetkishi 38%-ǵa artqan.
– Búgingi tańda «Qazaqstan halqyna» qory bilim salasynda 9 qaıyrymdylyq jobany júzege asyryp keledi. Qordyń atalǵan saladaǵy jobalarǵa qoldaý bildirýi – sapaly bilim alý úshin jaǵdaı jasaýdyń úlgisi, balalyq shaqqa salynǵan ınvestısııa. Bizdiń oıymyzsha, turǵylyqty jerine qaramastan, ár bala osynda jáne qazir bilim alý úshin teń múmkindikterge ıe bolýy kerek. Bilim berýdi turaqty damytý qory men «Nazarbaev zııatkerlik mektepteri» uıymymen birlesip iske asyrylyp jatqan osy joba – sonyń aıqyn dáleli, – dedi Lázzat Shyńǵysbaeva.
Aıta keteıik, eki kúnge sozylǵan konferensııada muǵalimderge Ulybrıtanııadaǵy Kembrıdj ýnıversıtetiniń qurmetti professory Kolın Maklaflın, Qazaqstannyń eńbek sińirgen ustazy Kúlásh Shámshıdınova, Nıderlandtaǵy Halyqaralyq mektepter keńesiniń (CIS) atqarýshy dırektory Djeın Larsson, Ulybrıtanııadaǵy Anglian Learning Multi Academy Trust kompanııasynyń negizin qalaýshy Keıt Evans, lıtvalyq psıhıatr Darıýs Radkıavıchııýs jáne bilim berý salasynyń ózge de tanymal sheteldik jáne otandyq sarapshylary óz zertteýleri men baıandamalaryn usyndy.
Pedagogıkalyq jıyn barysynda aýyl muǵalimderi otandyq jáne sheteldik avtorlardyń kitaptarymen tanysty. Kembrıdj ýnıversıtetiniń qurmetti professorlary Kolın Maklaflın, Lız Vınter jáne Natalıa Iаkoves redaksııalaǵan «Mapping Educational Change in Kazakhstan» kitaby men Dúıshón Shamatov pen Áıgerim Álıasqardyń «Bilimge qushtarlyq», sondaı-aq aǵylshyn tilinde jazylǵan tuńǵysh qazaq romanynyń avtory Ǵabıt Bekahmetovtiń «Barsa Kelmes: The Nomads Return» týyndysynyń tanystyrylymy ótti.
