Senator óz sózinde Koreıa Qazaqstannyń Azııa-Tynyq muhıty aımaǵyndaǵy negizgi saıası jáne ekonomıkalyq áriptesteriniń biri ekenin atap ótti. Elderimiz arasyndaǵy saýda-ekonomıkalyq jáne ınvestısııa salalaryndaǵy yntymaqtastyq qarqyndy damydy jáne rekordtyq kórsetkishterge jetti. Senator sonymen qatar elimizdegi negizgi qurylymdyq ekonomıkalyq reformalar týraly aıtyp, júrgizilip jatqan ózgerister saýda-ekonomıkalyq jáne ınvestısııalyq yntymaqtastyq úshin jańa múmkindikter ashatynyn atap ótti.
«О́ńdeý sektoryn damytýǵa basty nazar aýdarylady. Metaldardy tereń óńdeý, munaı hımııasy, aýyr mashına jasaý, ýrandy baıytý sııaqty salalarda iri jobalardy iske asyrý josparlanyp otyr. Osy maqsatta sheteldik jáne otandyq ınvestorlar alǵashqy úsh jylda salyqtar men basqa da mindetti tólemderden bosatylady. Bul – naqty óńdeý salasyna eleýli serpin berýge tıis negizgi másele. Agroónerkásip keshenin damytýǵa basa nazar aýdarylady. Sıfrlandyrý jáne ınnovasııalardy engizý máseleleri de basty nazarda bolady», dedi S.Aldashev.
Kezdesýge qatysýshylar aqparattyq tehnologııalar, sıfrlandyrý, jasyl ekonomıkany ilgeriletý, kıberqylmyspen kúres, mashına jasaý, taý-ken óndirisi jáne atom energetıkasy salasyndaǵy yntymaqtastyq máselelerin talqylady.
Koreıadan kelgen delegattar is-shara sońynda Qazaqstanmen yntymaqtastyqty joǵary baǵalaıtyndaryn jáne ekijaqty qarym-qatynastardy nyǵaıtýǵa belsendi yqpal etýge daıyn ekenderin atap ótti.
