Oblystyq saılaý komıssııasynyń tóraǵasy Qaırat Nurkenovtiń aıtýynsha, tús aýǵansha eki aýdan, bir qala boıynsha 50 paıyzdan artyq halyq óz tańdaýyn jasaǵan.
Prıozersk qalasynda da saılaý belsendi júrdi. Shaǵyn shaharda 11 saılaý ýchaskesi bar. Ýchaskelerde sanıtarlyq talaptar tolyq saqtalyp, baqylaýshylar tarapynan qadaǵalaý jumystary júrgizildi. Bul jóninde Prıozersk qalalyq saılaý komıssııasynyń tóraǵasy Bekzat Sársenbekov habarlady.
«Ár aýyl men qala óz ákimin ózi tańdap alady» degen Memleket basshysynyń sózinen keıin qala halqy saılaýǵa beıjaı qaramaǵandaı kórinedi. Jurt ýchaskege kelip, belsendi daýys berip, saılaý qarqyndy júrip jatyr. 6534 qala turǵyny saılaý ýchaskelerine tirkelgen. Túske deıin 44 paıyzdan astam saılaýshy daýys berdi. Saılaýǵa búkil jaǵdaı jasalǵan. Men daýys berýge kelgen adamdardyń kóptigine qýandym. Jáne bul tek 50 jáne 60 jastaǵy adamdar emes. Kelýshiler arasynda 18 jastaǵy azamattar da bar. Mysaly, jaqynda ǵana kámeletke tolyp, saılaýǵa ómirinde birinshi ret kelgen jigitti kezdestirdim. Bul jastardyń qalanyń jaǵdaıyna alańdap, óz bolashaǵyna umtylyp jatqanyn kórsetedi», deıdi Bekzat Sársenbekov.
Aqtoǵaı aýdany aýmaqtyq komıssııasynyń tóraǵasy Janbolat Raıymbekovtiń aıtýynsha, 38 saılaý ýchaskesi jumys istep tur. Saılaý ýchaskeleri bekitilgen erejege sáıkes jumys istedi. Ázirge zań buzýshylyq tirkelgen joq. Aýdan boıynsha barlyǵy tirkelgen 10 475 adam daýys beredi dep kútilip otyr. Densaýlyǵyna baılanysty úıinen shyqpaı-aq daýys bergen qarııalar bar. Osy oraıda saılaý ýchaskesine kele almaǵan qarttardyń úıine jáshikti arnaıy aparyp, tańdaý jasaýǵa múmkindik berilip otyr.
Osakarov aýdanynda da tańdaý jasaýǵa kelgen halyq belsendiligi joǵary. 42 saılaý ýchaskesi boıynsha 54 paıyzǵa jýyq turǵyn óz kandıdattaryna daýys bergen. Oblystyq saılaý komıssııasynyń tóraǵasy Q.Nurkenov saılaý keshki 20:00-ge deıin jalǵasatynyn, qorytyndy erteń shyǵatynyn málimdedi.
Qaraǵandy oblysy
