Aqkól-Jaıylma ánshilik mektebiniń ókili, Qazaqstannyń halyq ártisi Qaırat Baıbosynovtyń shákirti, ánshilikke óz órnegimen, áıgili aqyn-kompozıtor Estaıdyń ánimen terbelip kelgen, qaıtalanbas qoltańbasy bar keń tynysty ánshi, respýblıkalyq Ámire Qashaýbaev atyndaǵy baıqaýdyń bas júldegeri Erbol Aıtbaev bıyl erdiń jasyna jetip otyr. Erekeń Almaty konservatorııasyn támamdap kelgen soń, jergilikti mýzyka kolledjinde jas talanttardy shyńdady. Biraz jyl Astana memlekettik fılarmonııasynda jeke oryndaýshy bolyp qyzmet etip, 2002 jyly sol kezdegi S.Toraıǵyrov atyndaǵy PMÝ rektory Erlan Arynnyń arnaıy shaqyrtýymen Pavlodarǵa qaıta oraldy. Oqý orny ánshige ýnıversıtet professory degen mártebeli ataq berip, «Alqarakók» atty aýdıo dıski shyǵardy. Shákirtteri búginde ónerde óz oryndaryn taýyp, ustazynyń jolyn laıyqty jalǵastyryp keledi.
Konsertte dástúrli án-jyr men kúı óneriniń dúldúlderi Ramazan Stamǵazıev, Erlan Rysqalı, Tolǵanbaı Sembaev, Qaırat Kákimov, Kúnsulý Túrikpen, Qaırat Aıtbaev, Dáýrenbek Árkenov, Dáýrenbek Slámǵalı, Saltanat Qısatova, Jaıdar Shýnan jáne «Shernııaz» bı toby óner kórsetti. Arqada Erbol Aıtbaevtaı «Imanjúsip» pen «Jıyrma bes» ánderin naqyshyna keltire aıtatyn ánshiler sırek. Kórermen qoshemetimen bul súıikti ánderdi mereıtoı ıesi qulaq quryshyn qandyra shyrqady. Keshte kópshilik suraýymen Ramazan Stamǵazıev, Erlan Rysqalı sahnaǵa qaıta-qaıta shaqyrylyp, olar «Darıǵa dáýren», «Moldabaıdyń áni» týyndylaryn oryndap berdi.
PAVLODAR
