Memleket qaýipsizdigi men el turǵyndarynyń ómirine qaýip tóndiretin qylmystarǵa qarsy jedel áreket etetin «Búrkit» arnaıy jasaǵy týraly jaryqqa shyqqan jańa týyndy – osy bos keńistikti toltyrýǵa baǵyttalǵan otandyq kınematografııadaǵy úshinshi fılm. Mádenıet jáne aqparat mınıstrliginiń tapsyrysymen, Ulttyq kınony qoldaý memlekettik ortalyǵynyń qarjylandyrýymen túsirilgen kınokartına bolǵan oqıǵalardyń negizinde jankeshti jasaqtyń qat-qabat, qaýyrt jumysyn boıamasyz baıandaıdy.
Ulttyq kınony qoldaý memlekettik ortalyǵy basqarma tóraǵasy Qurmanbek Jumaǵalıdyń aıtýynsha, búgingi kórermenniń talǵamy bıik, suranysy jan-jaqty. Sondyqtan, kórermenge ártúrli janrdaǵy, osyndaı túrli trıýkqa toly ekshn fılmderdi de usynǵan jón. Fılmde «Búrkit» arnaıy jasaǵynyń sarbazdary «kúreń beret» kııý quqyǵyna ıe bolý úshin synǵa túsedi.
«Elimizde 200-ge jýyq «kúreń beret» ıegeri bar eken. Kúreń beret kııý mártebesine arnalǵan biliktilik synaǵynan ótý – jaýyngerlik rýhtyń belgisi. Sondyqtan, jańa fılmimiz jastardy Otanǵa degen adaldyq pen rııasyz mahabbatqa tárbıeleıdi dep senemiz», dedi Qurmanbek Jumaǵalı.
Fılmniń rejısseri – Danııar Ibragımov, bul kartına onyń debıýttik jumysy. Buǵan deıin Danııar «Qazbat» jáne «Altynshy beket» áskerı fılmderiniń prodıýseri bolyp, tyń taqyrypta eleýli tájirıbe jınaqtaǵan.
Fılmge Dáýren Serǵazın, Sanjar Mádı, Asylhan Tólepov, Gúlnáz Jolanova, Ásel Saǵatova, Jandos Aıbasov jáne Azamat Satybaldy syndy elimizdiń tanymal akterleri tústi. Sonymen birge qazaq mýzykasyna jańa stıl syılaǵan belgili estrada ánshisi Ǵalymjan Moldanazardyń da antagonıst keıipkerdiń rólinde kórinýi fılm shynaıylyǵyn arttyra túsken. Basty róldegi akterler túsirilim jumystaryna kirispes buryn birneshe apta boıy jaýyngerlik oqý-jattyǵýlaryna qatysyp, áskerı árekettiń ádis-tásilderin úırengen.
«Fılmge túsý úshin biz arnaıy normatıvterdi tapsyrdyq. Shynaıy sarbazdardan aıyrmashylyǵymyz bolmaýy úshin olardyń kúndelikti tynys-tirshiligimen jete tanystyq. Túsirilim aıaqtalǵansha 30 kılodan aýyr formany kıip júrdik. Bir epızodtyń túsirilimi kezinde arqamdy ońbaı jaraqattap aldym. Bir apta boıy em alýyma týra keldi. Kaskader jasaıtyn barlyq trıýkti ózim oryndaýǵa tyrystym», deıdi bas keıipkerlerdiń biri Sanjar Mádı.
«Burkit» fılminiń túsirilimine arnaıy jasaq, áskerı tehnıka jáne avıasııa, sondaı-aq eki júzden astam belsendi áskerı qyzmetshi qatysqan. Jedel-izdestirý sharalaryna arqaý bolǵan kartınanyń túsirilimi Almaty oblysynyń kórikti jerlerinde, Qonaev qalasynda, Esik kóliniń taý silemderinde jáne Ile ózeniniń boıynda ótken.
«Burkit» ekshn fılmi 2 qarashadan bastap barlyq kınoteatrda qazaq jáne orys tilderinde kórsetiledi.
ALMATY
