Kollajdy jasaǵan – Almas MANAP, «EQ»
Juqpaly aýrýǵa shaldyqqandardyń kúrt kóbeıýine baılanysty óńirlik shtab qurylypty. Sonymen qatar bas memlekettik sanıtarlyq dárigerdiń 1 qarashadaǵy №7 qaýlysyna sáıkes 6 qarashadan bastap 6-11 aı aralyǵyndaǵy balalarǵa qyzylshaǵa, qyzamyqqa jáne parotıtke qarsy qosymsha jappaı ekpe egý josparlanyp otyr. Turaqty tirkelmegen, qyzylshaǵa qarsy egilý deregi joq azamattar kelisim boıynsha bir ret ımmýndalady. Buryn bul aýrýǵa qarsy egilmegen 55 jasqa deıingi medısına qyzmetkerleri de ekpe alyp, halyq arasynda aqparattyq túsindirme júrgiziledi.
– Oblysta vaksınadan bas tartqan turǵyndardyń úlesi kóbeıip otyr. Josparly ekpeni almaı júrgender de az emes. Qazir Qyzylorda oblysy aýrý kórsetkishinen respýblıka boıynsha altynshy orynda tur. Aldyn alý sharalaryn kúsheıtpesek, jaǵdaı biz oılaǵannan da qıyndaı túsýi múmkin, – deıdi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Mamandardyń aıtýynsha, juqpaly aýrýlar kórsetkishiniń 4-5 jyl aralatyp kóterilip turatyny bar. Qyzylshaǵa shaldyqqandardyń artýy 2019 jyly da baıqalǵan. Eń qaýiptisi – qyzylshanyń pnevmonııa, bronhıt, ensefalıt sekildi aýrýlardy asqyndyryp jiberetini. Sondyqtan eń durysy – ekpe alý.
– Aýrý juqtyrǵandar arasynda eki jarym aılyq sábıler de bar. Negizi bala jasqa deıin ımmýnıtetti ana sútinen alyp, qyzylshamen aýyrmaýy kerek. Surastyra kelsek, bul nárestelerdiń analary kezinde osy juqpaly aýrýǵa qarsy egilmegeni anyqtalyp otyr. Osy kúni oblys boıynsha 330 tósektik oryn ázirlendi. Onyń ishinde 20 tósektik jansaqtaý bólimi bar. Aýdandaǵylardyń jaǵdaıy aýyrlaı qalsa, sanavıasııa arqyly kómek kórsetiledi, – deıdi oblystyq juqpaly aýrýlar aýrýhanasynyń bas dárigeri Aına Muhambetova.
Bıylǵy 5 jeltoqsannan bastap qosymsha ımmýndaýdyń ekinshi tolqyny bastalady degen qaýip bar. Bul rette 2-4 jastaǵy balalar qamtylmaq. О́ıtkeni dárigerlerdiń aıtýynsha, indet juqtyrǵandardyń qataryn osy jastaǵylar kóbeıtip otyr.
Koronavırýs pandemııasy kezinde qyzylsha men qyzamyqqa qarsy ekpege de senbestik tanytyp, saldyrmaǵandar kóp bolǵan edi. Sonyń zardabyn endi tartyp otyrmyz.
Qyzylorda
