Ortopedııa salasynyń tanymal mamany Mırambek Jumaǵulovtyń jetekshiligimen, oǵan qosa Prıorov atyndaǵy Ǵylymı-medısınalyq zertteý ortalyǵy (Máskeý) mamany Alekseı Shýmskııdiń qatysýymen alǵash ret elimizde jalpy tize men jambas býyndaryn endoprotezdeý, sondaı-aq tize býynyn bir aıdarshyqty protezdeıtin alǵashqy operasııalar jasaldy.Robottyń kómegine júgingen kezde árbir naýqasqa jeke emdeý tásili qaǵıdaty saqtalynyp, robot operasııaǵa deıin jasandy býyndy dál 3D josparyn jasap, ımplanttyń durys ólshemin, ony ornatatyn týra oryndy tańdaıdy.
«Qarashanyń 3-7 aralyǵynda biz endoprotezdeýge muqtaj 9 naýqasty tańdap, Qazaqstanda robottyń kómegimen tize jáne jambas býyndaryn aýystyrý boıynsha alǵashqy operasııalardy jasadyq. Úmitkerlerdi irikteý birneshe aı boıy yjdahattylyqpen júrgizildi. Dárigerler konsılıýmy ótip, jasandy býyndy dál 3D josparlaý úshin KT zertteýdiń sıfrlyq nátıjeleri AQSh mamandaryna jiberildi. Robottyń arqasynda operasııa aldyn ala josparlanǵandaı – 1 mm-den az qatelikpen júzege asyrylady. Sondaı-aq jumsaq tinderdiń saqtalýy barynsha qamtamasyz etilip, baılam apparatynyń ońtaıly tepe-teńdigine qol jetkiziledi», deıdi Almaty №4 QKA hırýrgııa bólimshesiniń meńgerýshisi Mırambek Jumaǵulov.
Osy arada Stryker kompanııasy usynǵan Mako tehnologııasy dálirek ári boljamdy hırýrgııalyq nátıje berip, naýqastyń densaýlyǵyn tez qalpyna keltirip, protezdiń de merzimin uzartatyna toqtala ketken jón. Mako tehnologııasy arqyly bir aıdarshyqty endoprotezdeý jasatqan naýqastar onyń zaqymy az ekenin, belsendi ómir saltyna tez oralý múmkindigi men protezdi óz býynyndaı sezingenderin aıtady.
«Búginde mundaı tehnologııa damyǵan elderde tanymal, ony AQSh, Kanada, Japonııa, Koreıanyń jetekshi klınıkalarynda qoldanyp keledi. Almaty qalasy ákimdiginiń qoldaýymen biz búgin Qazaqstanda robottyń kómegimen alǵashqy tize jáne jambas býyndaryn aýystyrý otalaryn jasadyq – bul ınnovasııalyq ortopedııa úshin ári travmatologııalyq-ortopedııalyq kómekti jetildirýdiń jańa kezeńi. Jyl saıyn mundaı operasııany qajet etetin naýqas sany artyp keledi. Máselen osy jyldyń 10 aıynda bizdiń aýrýhanada bir jarym myńnan astam býyn aýystyrý otasy jasalsa, endigi maqsatymyz – qyzmetimizdi jetildirip, sapaly medısınalyq kómek kórsetý», deıdi Almatydaǵy №4 QKA dırektory, medısına ǵylymdarynyń kandıdaty, MBA, DBA, professor Birjan Dosmaılov.
Aıtqandaı, 2012 jyly osy aýrýhanada jambas, tize, ıyq, shyntaq býyndaryn aýystyrýdy, sonymen qatar aıaq-qoldyń iri býyndaryndaǵy endoprotezdi tolyq jáne jartylaı aýystyrýdy júzege asyratyn mamandandyrylǵan endoprotezdeý bólimshesi ashylǵanyn aıta ketý kerek.
Al endoprotezdeý tájirıbesi 1975 jyly Anatolıı Chýchýlo №4 QKA-da jambas býynyn bir polıýsty endoprotezdeý operasııasyn jasaǵan kezden bastaý alady. Osy jyldar ishinde 20 myńnan astam pasıentke býyn aýystyrý operasııasy jasalǵan.
