Týrnırdiń ashylý saltanatynda aýdan ákimi Aelıta Ahmetsálimqyzy qatysýshylardy quttyqtap, qysqasha sóz sóıledi. Búgingi jasóspirimderdiń erteń Olımpıada chempıondary atanýyna tilektestigin bildirdi.
Shákirtin eske alýǵa arnalǵan týrnırge Pavlodardan D.Hasenovtiń bapkeri, Qazaqstannyń eńbek sińirgen jattyqtyrýshysy Nadyr Ádilhanov arnaıy keldi. Ataqty balýan Janádil Ataev, aýdandyq máslıhattyń hatshysy Erkebulan Zaǵyparov, álemniń eki dúrkin júldegeri, Qazaqstannyń alty dúrkin chempıony Azamat Dáýletbekov balǵyn balýandardy quttyqtady. D.Hasenovtiń kózin kórgen aǵalary men dostary, sonaý Astana men Almatydan, О́skemennen at terletip kelgen Qadylbek Smaǵulov, Qazybek Smaǵulov, Marat Saýhatov onyń sportqa sińirgen eńbegi týraly tebirene aıtty.
Beldesýler asa tartysty ótti. О́z salmaq dárejeleri boıynsha Omar Jáńgirhan, Álem Tóleýbekov, Ámir Ámirbek, Sabyrjan Rahatov, Murat Temirlan, Maǵyna Baqytnur, Nurlybek Nuráli, Samat Dosymuly, Asylbek Orazbaev, Aıbek Ilııasuly chempıon atandy. Zaısandyqtar arasynan Janat Daryn, Arsen Altynbekuly, Nurǵalym Dáýletbekuly, Batyr Serikboluly, taǵy basqalar júldeli oryndarǵa ıe boldy. Jeńimpazdar men júldegerler aqshalaı marapattaldy.
Zaısan aýdany balýandaryn qorǵaýǵa arnalǵan «Zaısan jaısańdary» degen qor ashyldy. Onyń tóraǵasy bolǵan Kenjebek Mákenovke D.Hasenovtiń dostary at mingizdi.
Ońdasyn ELÝBAI,
jýrnalıst
Shyǵys Qazaqstan oblysy
