KTK telearnasynyń jýrnalısteriniń habarlaýynsha, áıel adam ógeı qyzyn únemi uryp-soǵyp, óz dáretin ózi ustaı almaıtyn halge jetkizgen.
"Jantúrshigerlik qylmys bıyl jazda bolǵan. Jaýyz áıel jetkinshekti júıeli túrde sabap kelgenin kýágerler aıtyp otyr. Aqyr sońynda úlken dáretin jiberip qoıǵany úshin basyn qabyrǵaǵa uryp taldyrǵan. Qyz bala es jımastan qaıtys boldy. Jaýyzdyq jasaǵan qyzdyń ógeı sheshesi kezinde qoǵamdyq-áleýmettik máselelerdi kóterip júrgen belsendisymaq eken. 47 jastaǵy áıelge ógeı qyzyn uryp óltirdi degen aıyp taǵylyp otyr. Búgingi aldyn ala tyńdalymǵa ol tyńǵylyqty daıyndalyp kelgen syńaıly", deıdi arna tilshileri.
Qazirgi tańda marqum bolǵan balaqaıdyń ájesi áıeldi qatań jazaǵa tartylǵanyn talap etip otyr.
"Meniń talabym, ol áıeldi ómir boıyna bas bostandyǵynan aıyrý. О́ıtkeni nemeremdi tórt aı boıy uryp, aqyry óltirip tastady. Negizi ákesi de Karınany urǵan. Biraq ol jazadan qutylyp ketti. Ákesin de qamaýǵa alý kerek", deıdi Elena Zakýraeva, marqumnyń ájesi.
Sonymen birge kýágerler jeti jasar qyzdyń ákesin de jazaǵa tartý kerek ekenin alǵa tartýda. Belgili bolǵany, týǵan sheshesi 10 aılyǵynda qashyp ketken kishkentaı Karınany 7 jasyna deıin negizi ájesi baǵyp-qaqqan.
Alaıda bıyl kóktemde ákesi Báken Zakýraev ınspektorlarmen kelip qyzdy alyp ketken. Sóıtip ózinen 14 jas úlken azamattyq nekedegi áıeli Baljan Turlybekovanyń úıine aparady. Sol ýaqytta ekeýi birge jarty jyl ǵana turypty. Karına jat jerde tórt aı boıy ógeı sheshesinen de, týǵan ákesinen de ábden taıaq jegen deıdi jaqyndary. Belbeýmen sabaǵanyn kórshileri de kóripti.
Aıtýlarynsha, aqyr sońynda, 10 shildede jetkinshek úlken dáretin jiberip qoıǵany úshin ógeı sheshesi basyn qabyrǵaǵa urady. Qatty soqqydan mıyna qan quıylyp, Karına birden jantásilim etken.
О́geı qyzyn óltirdi dep aıyptalǵan Baljan Turlybekova 20 jyl nemese ómir boıyna deıin bas bostandyǵynan aıyrylýy múmkin. Al áıeliniń qatigez ekenin bile tura, arasha túspegen ákesi jazaǵa tartylady ma, joq pa, ázirge belgisiz. Keıbir málimetke súıensek, Báken Zakýraev sol oqıǵadan keıin qańǵybastyń kúıin keship ketken.
