Baıqaýdy D.Nurpeıisova atyndaǵy akademııalyq qazaq halyq aspaptar orkestri uıymdastyrdy. Orkestr basshysy Baqytbek Sartbaevtyń aıtýynsha, uly kompozıtordyń kúıshilik óneri jalǵasyn tabýy qajet. Sol sebepten, jas talanttar men sheber oryndaýshylardy tabý, daryndy ónerpazdardyń kásibı sheberligin arttyrý maqsaty kózdelipti.
Qazylar alqasyna jetekshilik etken tanymal kompozıtor, Qazaqstannyń eńbek sińirgen qaıratkeri Aıtqalı Jaıymovtyń aıtýyna qaraǵanda, dombyrashylar baıqaýy jańa baǵytta, joǵary deńgeıde ótken.
«Dombyrashylarǵa ózgeshe talap qoıyldy. Bul – burynnan jıi oryndalyp júrgen kúılerdi emes, kerisinshe, kóp estilmeı júrgen týyndylarǵa kóbirek mán berý. Mundaı talap sırek oryndalatyn shyǵarmalarǵa jańa lep berip, kıeli sahnaǵa qaıta oralýyna jol ashty. Bizdiń kúıshi babalarymyzdyń ártúrli taqyrypty qamtıtyn shyǵarmalary óte kóp. Solardyń barlyǵyn derlik jas urpaqqa dáriptep, stıli men oryndalý ereksheligin kórsetý qajet. Sol sebepten, osyndaı is-sharalar kóbirek ótýge tıis» deıdi A.Jaıymov.
Dombyrashylardyń oryndaýshylyq sheberligin, sahna mádenıetin saqtaý mánerin saralaǵan qazylar baıqaýdyń bas júldesine almatylyq Meıirbek Ázimbaevty laıyq dep tanydy. Oǵan 1 mln teńge tabys etildi.
Al Atyraý qalasynyń ónerpazy Aqbóken Temir birinshi orynnyń júldesi – 800 myń teńgeni ıemdendi. Ekinshi júldege jergilikti eki dombyrashy – Nurlybek Nájekenov pen Nazerke Bazarbaeva ıe bolyp, árqaısysyna 600 myń teńge berildi. Úshinshi orynnyń 400 myń teńgesin almatylyq Lázzat Aqıhat pen Nuraı Zınor ıelendi.
Atyraýlyq Serik Álibekovke baıqaýdyń úshinshi orny, Qurmanǵazy atyndaǵy qazaq memlekettik akademııalyq halyq aspaptary orkestriniń arnaıy júldesi men aqshalaı syılyǵy tabystaldy. Sondaı-aq Qurmanǵazy atyndaǵy arnaıy júldeniń 200 myń teńgelik syıaqysymen astanalyq Qaırat Jumaǵalıev pen almatylyq Arsen Tursyn marapattaldy.
«Munda qazaqtyń belgili óner maıtalmandarynyń aldynda óner kórsetý ońaı bolmady. Baıqaýdaǵy ár kezeńniń ózindik qıyndyǵy bar. Qobaljydyq, ýaıymdadyq. Osyndaı sezimdi bastan keshtik. Sonyń bári artta qaldy. Bas júldeger atanyp, qýanyp turmyn. Eń bastysy bul baıqaýda sheberlik shyńdadyq», deıdi M.Ázimbaev.
Atyraý oblysy
