Mınıstrliktiń baspasóz qyzmeti habarlaǵandaı, Belgııa astanasynda Marat Qarabaev eýropalyq komıssııanyń vıse-prezıdenti Marosh Shefchovıchpen, kólik jónindegi eýrokomıssar Adına Valeanmen, EQDB prezıdenti Odıl Reno-Bassomen, sondaı-aq BESIX belgııalyq-fransýzdyq qurylys kompanııasynyń bas dırektory Fılıpp Dessomen kezdesip, onda Qazaqstan men Eýropalyq odaqtyń qurylys, energetıka, kólik jáne logıstıka salasyndaǵy yntymaqtastyǵyn tereńdetý máseleleri talqylanǵan.
Bularmen birge, M.Qarabaev Hyrasia One kompanııasy men «Sarja» teńiz termınaly arasyndaǵy Quryq portynan Eýropaǵa taza sýtegi men ammıakty tasymaldaý jónindegi kelisimge qol qoıý rásimine qatysqan. Bul kelisimshart taǵy bir kópfýnksıonaldy «Sarja» termınalynyń qurylysyn bastaýǵa múmkindik beredi.
«Biz tıimdi tranzıttik transkontınentaldyq dálizder men marshrýttar jelisin qurdyq. Shyǵys-Batys baǵyty boıynsha Transkaspıılik halyqaralyq kólik baǵdarynyń róli arta tústi. Buǵan 2022 jyldyń qorytyndysy boıynsha EO, OA jáne QHR arasyndaǵy júk tasymaly kóleminiń eki ese ósýi dálel», dedi kólik dálizderi boıynsha plenarlyq jáne paneldik sessııaǵa qatysqan Kólik mınıstri.
Sonymen qatar 2017 jyldan bastap Qazaqstan, Qytaı, Ázerbaıjan, Grýzııa, Túrkııa, Rýmynııa, Polsha jáne Bolgarııanyń qatysýymen Halyqaralyq THKB qaýymdastyǵy jumys isteıtinin atap ótti. Mınıstrdiń aıtýynsha, bul kúnderi Aýstrııa, Germanııa, Lıtva, Latvııa, Estonııa jáne Majarstan atalǵan kólik baǵdaryna kirýge qyzyǵýshylyq tanytyp otyr.
