Sýretti túsirgen – Erlan OMAR, «EQ»
Jýyrda Astanada «Medbıke isiniń úshtuǵyrlyǵy: klınıkalyq tájirıbe, zertteý jáne bilim berý» taqyrybynda halyqaralyq ǵylymı-praktıkalyq konferensııa ótip, onda álemdik tájirıbedegi biregeı ınnovasııany damytýdyń jetistikteri men keleshegi qaraldy. Bul jóninde Astana medısına ýnıversıtetiniń rektory Kamaljan Nadyrov tarqatyp aıtty.
– Qazaqstanda medbıkelik bilim berýdi jetildirýge baǵyttalǵan AccelEd jobasyna Lıtva densaýlyq ǵylymdary ýnıversıtetinen, JAMK qoldanbaly ǵylymdar ýnıversıteti jáne Fınlıandııanyń Abo Akademııa ýnıversıteti, Nıderlandynyń Ýtreht ýnıversıteti, Nazarbaev ýnıversıtetiniń medısına mektebinen, Astana medısınalyq ýnıversıtetinen, Qazaq ulttyq medısına ýnıversıtetinen, Qaraǵandy medısına ýnıversıtetinen, Ońtústik Qazaqstan medısına akademııasynan akademııalyq seriktesterimiz qatysady. Medbıke isiniń damý tendensııalary qazirgi densaýlyq saqtaý júıesinde mekbıkeniń róli aıtarlyqtaı joǵarylaǵanyn kórsetedi. Medbıke mamandarynyń jumysyna ǵylymı kózqaras pen dáleldi tájirıbeni engizý – medbıkeni táýelsiz medbıkelik sheshim qabyldaıtyn, dáleldi medbıkelik kútimdi josparlaıtyn jáne júzege asyratyn dárigerdiń teń quqyly seriktesine aınaldyrdy, – deıdi Q.Nadyrov.
AccelEd jobasy magıstratýra deńgeıinde medbıke isi boıynsha bilim berýdi nyǵaıtýǵa jáne elde medbıke ǵylymy boıynsha PhD doktorantýra baǵdarlamasyn qurýǵa baǵyttalǵan. Bul bilim berý baǵdarlamalarynyń túlekteri densaýlyq saqtaý salasynda erekshe suranysqa ıe. Mysaly, Astana medısına ýnıversıteti magıstratýra baǵdarlamalaryn engizgen tustan bastap medbıke isi boıynsha 32 magıstr daıyndaǵan. Qazir «Medbıke isi ǵylymy» baǵdarlamasy boıynsha 5 doktorant bilim alyp jatyr eken. Al keler jyly barshamyz medbıke ǵylymy boıynsha bilim alǵan eldegi alǵashqy doktorlardyń qýanyshyna kýá bolamyz. Iá, jyl ótken saıyn medbıkelerdiń quzyrettiligi artyp keledi. Olarǵa bilim berý qoljetimdi ári sapaly bola bastady. Bul joba magıstratýra jáne doktorantýra deńgeıinde medbıkelik bilim berý isin nyǵaıtýǵa, medbıke ǵylymynyń órkendeýine tyń serpin beredi.
