Foto: Astana ákimdigi
Birinshiliktiń ashylý saltanatyna Qazaqstan dzıýdo federasııasynyń prezıdenti Qýanyshbek Esekeev, Astana qalasynyń Dene shynyqtyrý jáne sport basqarmasy basshysy Samat Jylqybaev, Sport jáne dene shynyqtyrý isteri komıtetiniń tóraǵasy Erbol Myrzabosynov qatysty.
«Memleket basshysynyń «Otandyq sportta ádil básekelestik qaǵıdatyn ornatý» týraly tapsyrmasyna sáıkes, búgingi chempıonatqa shetelden 3 táýelsiz tóreshi shaqyrtyldy. Qazirgi tańda elimizde dzıýdomen 133 myńǵa jýyq adam turaqty túrde aınalysady. Sonyń nátıjesinde el sportshylary halyqaralyq dúbirli dodalarda top jaryp, ult abyroıyn asqaqtatyp júr. Olar óskeleń urpaqqa úlgi-ónege bolyp, jastardy jarqyn jeńisterge jeteleıdi», dedi jarystyń ashylý saltanatynda Erbol Myrzabosynov.
Búgingi jarys kúniniń nátıjesi boıynsha erler jáne áıelder arasynda 5 salmaqta jeńimpazdar anyqtalady.
Aıta keteıik, chempıonattyń qorytyndysy boıynsha 2024 jylǵa dzıýdodan ulttyq qurama jasaqtalady. Jarys Jaqsylyq Úshkempirov atyndaǵy jekpe-jek saraıynda 15 qarashaǵa deıin jalǵasady.
