El azamattarynyń aıryqsha bastamasy

Eski mektepten eseıip shyǵyp, azamat atanǵandar kóp­tep sana­lady. Degenmen shákirt­ter­diń bo­ı­y­na ult rýhynyń óreli óne­ge­sin uıalatqan eski mek­tep ýaqyt mújip alasardy ári oqý-tárbıe ju­mysyn zaman talabyna saı ót­kerýge tar­lyq etti. Osyny esker­gen aýyl azamattarynyń bas­ta­ma­sy­men jekemenshik turǵyn úı qury­ly­sy retinde salynǵan bul úıdi bas­tap­­qyda-aq mektep teńge­ri­mine berý josparlanǵan edi.

Úsh jyl buryn Tasqudyq tur­­­ǵyn­­darynyń bastamasyn qup kór­gen sol kezdegi aýdan ákimi Talǵat Qaı­narbekov mektep irge­ta­syn kó­te­rýge shuǵyl túrde qar­jy qaras­tyrǵan bolatyn. Igi bas­tamaǵa sol jyldary kópshilikti uıys­­tyra bilgen «Babalar rýhy» qory kómekke keldi. Qor tór­aǵa­sy Janat Muqashevtyń aıtýyn­sha, aýdandaǵy qaltaly kásip­ker­ler­den túsken qomaqty qarjy mek­tep qurylysyna baǵyttal­dy da qurylys materıaldary qol­da­ryna tıgen bastamashyl tur­­ǵyn­dar iske kiristi. Degenmen pandemııa zar­da­bynan jumys birer jyl toqyrap, byltyrdan beri aýyl tur­ǵyndarynyń uıysýymen zamanaýı mektep jetkinshekterdiń ıgiligine usynyldy.

50 orynǵa arnalǵan mekteptiń 3 synyp kabıneti, ashana, muǵa­lim­der bólmesi bar jáne de oqý­shylardyń qaýipsizdigin qam­ta­masyz etý maqsatynda ishki dáret­hanalarmen, beıne­ba­q­­y­laý­larmen tolyq qamtamasyz etil­gen.

Shákirtteriniń boıyna ult rýhynyń óreli ónegesin uıalatyp, tárbıe men biliktilikti ushtastyra biletin ustazdar qaýymy ortaq iske yntymaq-birlikpen ujym­das­qan aýyldas­ta­rynyń qareketine dán rıza. О́negeli is osyndaı shal­ǵaıda ornalasqan ózge de aýyl­darǵa úlgi bolaryna senedi. Kóp­tiń tilegi oryndalǵan kún mereke­men para-par.

«Mynadaı zamanaýı jab­­­d­yq­­talǵan mektepte bilim sapa­sy da oıdaǵydaı bolmaq. Jańa shańy­raqtyń irgesi kóte­rilgeli oqýshy­lar­dyń da kóńili kóterildi. Endi shaǵyn aýyldyń shyraıy kirmek. Kishkentaı baldyrǵandardyń bola­shaǵyna jola­shar aıaýly meken­niń ár kirpishi osyn­da­ǵy azamat­tardyń arqasynda qalandy. Bir jeńnen qol, bir jaǵadan bas shyǵarǵan jerlesterime rızamyn», deıdi bas­taýysh mektep meńgerýshisi Quralaı Aıtova.

Mektepke deıingi daıarlyq syny­bynyń muǵalimi Láıla Toq­mýr­zına da osyndaı múmkindikti qam­tamasyz etken azamattarǵa arnaıy alǵysyn bildirdi. Aýyl­dastaryn ortaq iske jumyl­dyr­ǵan Aslan Qusaıynov, Ermek Toqmýrzın, Sovethan Mamyr­baev­tar alystan kóz tartatyn jańa mektep aınalasynda bola­shaqta sport alańdary salynsa degen izgi maqsattyń oryn­da­lýyn­ asyǵa tosady.

Jańa mekteptiń ashylý sal­ta­natynda Sarqan aýdany áki­miniń mindetin atqarýshy Asqat Qalıasqarov, aýdannyń Qur­met­ti azamattary Jomart Igi­man, Janat Muqashev, Baqa­ly aýyldyq okrýginiń ákimi Áset Qanapııanov, K.Qazybaev atyndaǵy orta mekteptiń ustazy Raıhan Qııahmetova, aýyl azamattary atynan Aslan Qusaıynov yntymaq-berekeniń arqasynda qoldanysqa berilgen bilim oshaǵy ujymynyń, jetkinshekterinen úmit kútetin ata-analardyń qýa­nyshyn bólisti. Bastaýysh mek­tep saltanatty túrde ashylyp, jıynǵa qatysýshylar jańa nysannyń jabdyqtalǵan kabı­net­terin aralap kórdi.

Jıyn sońynda aýyldyq Máde­nıet úıi ónerpazdary men oqý­shylar daıyndaǵan shaǵyn konsert kórermen nazaryna usynyldy.

Jetisý oblysy