Olga Perepechına forýmda sóılegen sózinde áıelderdiń ekonomıkalyq áleýetin damytý, zorlyq-zombylyqqa qarsy kúres jáne Eýropalyq odaqpen yntymaqtastyqtyń basymdyqtary týraly aıtty. Depýtat Ortalyq Azııa áıelderiniń dıalog tuǵyrnamasynyń mańyzdylyǵyna toqtala kele, alańnyń Qazaqstandaǵy jumysynyń nátıjelerin atap ótti.
«Qazaqstannyń demografııalyq qurylymynda áıelder halyqtyń 51 paıyzyn quraıdy. Eńbek naryǵyndaǵy áıelderdiń úlesi shamamen 48 paıyz bolyp otyr. Búginde bizdiń respýblıkamyzda bilim berý, densaýlyq saqtaý jáne áleýmettik qorǵaý salasyndaǵy jaldamaly qyzmetkerlerdiń 70 paıyzdan astamy áıel. Jalpy, genderlik teńdik salasyndaǵy halyqaralyq reıtıngterde bizdiń elimiz ilgerileýdiń oń úrdisine ıe. Sondaı-aq Prezıdenttiń tapsyrmasy boıynsha memleket qatysatyn kompanııalardaǵy basshylyq laýazymdarǵa áıelderdiń 30 paıyz ókildigin engizý áıelderdi saıası ilgeriletý baǵytyndaǵy mańyzdy qadam boldy», dedi Olga Perepechına.
Senator Memleket basshysy Qasym-Jomart Toqaevtyń genderlik saıasatty iske asyrý máselelerine basa nazar aýdaryp otyrǵanyn atap ótti. Senator Otbasylyq-demografııalyq jáne genderlik saıasat tujyrymdamasy 2016 jyly qabyldanǵanyn, al 2021 jyly Prezıdenttiń tapsyrmasy boıynsha mańyz berilgenin habarlady.
«Bıylǵy maýsym aıynda Qazaqstan Prezıdenti Qasym-Jomart Toqaevtyń tapsyrmasy boıynsha Ornyqty damý salasyndaǵy maqsattar men mindetterdi monıtorıngileý jónindegi parlamenttik komıssııa quryldy. Komıssııany Senat tóraǵasy Máýlen Áshimbaev basqarady. Parlament ornyqty damý maqsattaryn iske asyrý máselesin óz baqylaýyna aldy, oǵan genderlik teńdikti qamtamasyz etýge jáne barlyq áıelder men qyzdardyń quqyqtary men múmkindikterin keńeıtýge baǵyttalǵan 5 maqsat kiredi», dep atap ótti depýtat.
Forým barysynda qatysýshylar áıelderdiń ekonomıkalyq áleýetiniń ósýi, genderlik zorlyq-zombylyqqa qarsy kúres, genderlik teńdik salasyndaǵy zańnamany jetildirý, klımattyń ózgerýi, sondaı-aq EO-men parlamenttik yntymaqtastyq sekildi taqyryptardy talqylaýdy josparlady.
