Atalǵan bastama boıynsha bala ińgálap dúnıege kelgennen bastap onyń atyna qarjy aýdaryla bastaıdy. Bul qarjy 18 jasqa tolǵansha jınaqtalyp, balalardyń bolashaǵyna joldama berýi úshin baspana alýǵa jáne bilim alýǵa jumsalady. Bul rette bir maqsattyń «bilim alý» dep belgilengeni óte mańyzdy. О́ıtkeni balalaryn oqýǵa túsire almaı qınalyp qalatyn ata-analar barshylyq. Ásirese kópbalaly otbasylar barlyq balasyn túgel qamtamasyz etýge jaǵdaıy jete bermeıdi. Búginde qosymsha bilimsiz, repetıtordyń kómeginsiz bilim grantyna qol jetkizý óte qıyn. Al arnaıy repetıtor jaldap, balalarynyń daıyndyǵyn kúsheıtýge kópbalaly ata-analardyń qaltasy kótermeı jatady. Osyndaı bala-shaǵasy kóp otbasy kóbine áleýmettik jaǵynan az qamtylǵandar sanatyna kiredi. Olar úshin áleýmettik baǵdarlamalardyń septigi mol. Sondyqtan da «Ulttyq qor – balalarǵa» baǵdarlamasy paıda bolǵanda, eń aldymen, osy kópbalaly otbasylar úshin qýanyp otyrmyn.
Buıyrsa, kelesi jyldan bastap baǵdarlamanyń ıgiligin kóre bastaımyz. Bul rette qordyń tabysyn arttyratyn is-sharalar da myqtap qolǵa alynatyn shyǵar dep oılaımyn. Buǵan tabysyn jasyratyn kásipkerler de ashyqtyqqa kóship, balalardyń qamy úshin kómek etýi kerek.
Sonymen qatar bolashaqta «Ulttyq qor – balalarǵa» baǵdarlamasy aıasynda jınalǵan qarajattyń balalardyń emine jumsaýǵa múmkindik berilse eken degen tilegimiz bar. Sebebi balalarynyń emine aqsha jetkize almaı, kópshilikten jylý jınap júrgender áli de kóp. Mundaı kómekke muqtajdardyń barlyǵyna «Qazaqstan halqyna» qory jetkilikti deńgeıde qol ushyn soza almaı otyr. Osy oraıda aýyr dertke ushyraǵan jáne múgedektigi bar balalardyń emine qajet qarajat máselesin qaperge alǵan jón.
Lázzat QOJAHMETOVA,
«Talbesik» kópbalaly analar odaǵy» qoǵamdyq birlestiginiń jetekshisi,
Ulttyq quryltaı múshesi
