Foto: Polisia.kz
Petropavldaǵy saýda jelisiniń dırektory ózine aqsha bopsalaýshylardyń qysym kórsetkeni týraly aryz jazǵan. Jedel is-sharany iske asyrǵan polısııa qyzmetkerleri eki turǵyndy ustady.
«33 jáne 34 jastaǵy eki jas jigit áleýmettik jelilerde tutynýshylardyń quqyqtaryn qorǵaýǵa arnalǵan resýrstardyń avtorlary retinde kópshilik arasynda jaqsy tanys. 2022 jyldyń basynan bastap tutynýshylardyń quqyqtaryn qorǵaýdy uran etken er adamdar Petropavldyń saýda núktelerinde reıdter júrgizip otyrǵan. Blogerler retinde saýda jelisi qyzmetkerleriniń qatysýymen arandatýshylyq sıpatyndaǵy beınerolıkter túsirip, polısııa men ózderi arasynda janjaldy jaǵdaılar jasap otyrǵan. Alaıda olar jelidegi aýdıtorııa arasynda zor tanymaldyqqa ıe bolmaǵan. YouTube arnasy men Instagram jelisinde birneshe myń jazylýshysy bar, kópshiligi SQO turǵyndary. Arandatýshylyq pen janjaldar kezinde merzimi ótken ónimdi satý faktisin jeleý etip júrgen. Alaıda keı jaǵdaılarda — shokolad, sýsyndar sııaqty taýarlardyń aqshasyn tólemeı ózderimen birge alyp ketip otyrǵan. Kúdiktiler reıdtik sharalarymen birge memlekettik organdarǵa saýda oryndarynda anyqtalǵan zań buzýshylyqtar týraly shaǵymdardy jibergen. Osyndaı áreketteri arqyly bıznesti jospardan tys tekserýge sebepshi boldy. Qyrkúıek aıynyń basynda jastar bopsalaý arqyly saýda jelisiniń óńirlik dırektorynan óz áreketterin toqtatýǵa 50 mln teńge somasynda aqsha talap ete bastaǵan», delingen aqparatta.
Oblystyń uıymdasqan qylmysqa qarsy kúres basqarmasynyń qyzmetkerleri bopsalaýshy «blogerlerdi» 5 mıllıon teńge mólsherindegi aqshany alǵan kezde ustaǵan. Ustalǵandardyń ústinen Qylmystyq kodekstiń 194-baby 2-bóligi 2-tarmaǵy boıynsha sotqa deıingi tergeý bastaldy.
