Ákimmen kezdesý barysynda kásipkerlerdiń biri Anastasııa Zaharenkova qala mektepterinde bir balaǵa bólinetin tamaqtyń qunyn kóterý máselesin kóterdi. Onyń aıtýynsha, soma qosylǵan qun salyǵyn qosqanda 584 teńgeni quraıdy.
«Bul soma ónim jıyntyǵynyń qunyn áreń jabady, jetkizýshilerdiń paıdalaný shyǵyndary men jalaqysy esepke alynbaıdy. Altaı Kólginovpen ótken jyly kezdesýde bul másele qaıta-qaıta kóterilgen edi... Astana qalasynyń Bilim basqarmasy 2020 jyly azyq-túliktiń mólsheri shamamen 684 teńge bolýy kerek dep resmı jaýapta habarlaǵan bolatyn. Baǵa qashan turaqtalady? Mundaı baǵamen sapaly azyq-túlikti talap etý múmkin emes», deıdi ol.
Buǵan jaýap retinde Jeńis Qasymbek ákimdiktiń máslıhatqa tıisti qujattaryn ázirlep jatqanyn, azyq-túlik baǵasyn 700 teńgege deıin kóterý josparlanyp otyrǵanyn aıtty.
«Biz bul ósimdi birneshe kezeńmen júzege asyrýdy josparlap otyrmyz. Birinshi kezeńde 700 teńgege deıin kóteremiz. Qalada bir ǵana bıýdjet bar ekenin túsinińiz. Bul óte mańyzdy suraq. Oǵan qosa balabaqshalar men mektep salý da mańyzdy másele. Sondaı-aq jylý men sý berý kerek. Osynyń barlyǵyna bir ǵana bıýdjet qarastyrylǵan. Sondyqtan máseleniń bir jaǵyn japsaq ekinshi másele týyndap otyr. Siz bizdi túsinýińiz kerek. Bir balaǵa shamamen ystyq tamaq quny 700 teńge bolady dep sóz beremin», dep túıindedi sózin qala ákimi.
