Halqymyz aıtpaqshy, ustazdar qaýymy – «bir teriniń pushpaǵyn ılep júrgen» jandar. Oqý deńgeıin kóterip, sapaly bilim arqyly sanaly da salamatty urpaq qalyptastyrýdy ortaq maqsat tutady. Osy tusta, aýyl mektepterindegi áriptesterimizdi qoldaý, komandasynyń bir múshesi bolý – men úshin zor ǵanıbet, úlken tájirıbe. Bıylǵy oqý jylynda NIS komandasy bolyp, Syrym, Bórli, Jánibek aýdandaryna saparǵa attandyq.
Ádistemelik kómek, aldymen, Aqsaı qalasynyń №5 jalpy bilim beretin mektebinen bastaý aldy. Bórli aýdanynyń bilim ordasy qazaq tili, geografııa pánderinen ashyq sabaq ótkizip, psıhologııa baǵyty boıynsha «Berik otbasy» baǵdarlamasy aıasyndaǵy bala men ata-ana yntymaqtastyǵy týraly is-sharany nazarǵa usyndy. Buǵan qosa tirek mektep pedagogteri mektep kitaphanasyna qatysty jáne robottehnıka úıirmesiniń sheńberinde týyndaǵan suraqtarǵa jaýap aldy.
Nazarbaev zııatkerlik mektebiniń komandasy Aqsaı mektebi oqýshylarynyń ǵylymı jobalar jármeńkesin tamashalap, oqýshylar men muǵalimderge zertteý daǵdylaryn damytýdyń tıimdi tásilderi jóninde óz oılaryn ortaǵa saldy. Lesson study boıynsha zertteý jumystaryna taldaý jasap, bilim uıasynyń áleýetin damytý jaıynda pikirlerin bildirdi. Qos mektep muǵalimderi kásibı ashyq dıalogke túsip, tájirıbe almasty.
– Biz Nazarbaev zııatkerlik mektepteri jelisiniń bilim berý júıesindegi úzdik tájirıbemen bólise aldyq. Aqsaı qalasyndaǵy №5 mektep ujymy óte uıymshyl ári ózgeriske daıyn ekeni semınardyń bastapqy kezeńinen-aq baıqaldy. Aqsaıdaǵy áriptesterimiz tyǵyz qarym-qatynas ornatý arqyly oqytý men baǵalaýǵa qatysty máselelerdiń sheshimin taba aldy, – deıdi Oral qalasy Nazarbaev zııatkerlik mektebiniń qazaq tili men ádebıeti pániniń muǵalimi Sáken Myńbaev.
Sondaı-aq Nazarbaev zııatkerlik mektebiniń muǵalimderi Jánibek aýdany T.Jarokov atyndaǵy jalpy orta bilim beretin mektep ujymyna «Bookcrossing» sheńberinde 100-den astam kitap syıǵa tartty.
Tájirıbe taratý kúni fızıka, matematıka, qazaq tili, orys tili, aǵylshyn tili, bıologııa pánderinen jáne bastaýysh synyp, psıhologııa, IT baǵytynda ashyq sabaqtarmen jáne kitaphana isi boıynsha semınarmen jalǵasty.
– Ashyq sabaqtarmen qosa ǵylymı joba, esse jazý algorıtmi, ata-analarǵa arnalǵan ashyq tárbıe saǵaty sekildi is-sharalarǵa qatysyp, keri baılanys ornattyq. Taıyr Jarokov mektebindegi áriptesterimizben kelesi qadamdardy naqtyladyq. Aldaǵy ýaqytqa jospardy birlese qurdyq. Koýchıng sessııalary kezindegi talqylaýlarda áriptesterimiz tájirıbelerinde kezdesken qıyndyqtary men máseleleri boıynsha jaýap izdeýde erekshe belsendilik tanytty. Bilim salasyndaǵy ózgeriske beıim, yntaly ujymmen birlesken jumys jalǵasyn tabady, – deıdi Nazarbaev zııatkerlik mektebiniń qazaq tili men ádebıeti páni muǵalimi Jansáýle Maqsotova.
NIS muǵalimderi Jánibek eldi mekeniniń murajaıymen, sondaı-aq oqýshylardyń jetistikteri kórsetilgen kórmemen tanysty. Aýdannyń tarıhı-ólketaný murajaıy men eldegi qasterli oryndarmen tanysý múmkindigine ıe boldy.
Áriptesterimiz odan ári qoldaý jumystaryn Syrym aýdanynda jalǵastyrdy. Aldymen, «Bookcrossing» aksııasy boıynsha Syrym aýdanynyń Qadyr Myrzalıev atyndaǵy jalpy orta bilim beretin mektebine 100 kitap tartý etildi. Kitap qoryn toltyrý saltanatynan soń, aýyl ustazdary qazaq tili, aǵylshyn tili, fızıka, hımııa, ınformatıka pánderinen ashyq sabaq ótkizdi. Sonymen qosa «Qarym-qatynastaǵy emosıonaldy mádenıettilikti qalyptastyrý» atty psıhologııalyq semınar-trenıng pen kitaphana isi boıynsha tájirıbe jumystary ótti. NIS komandasy tirek mektep muǵalimderiniń jumystaryna tolyqtaı taldaý jasap, «FILA» ádisi arqyly keri baılanys aldy. Pedagogıkalyq basqosý barysynda qajetti ózgerister ashyq aıtylyp, qos mektep ustazdary birlese sabaq josparyn qurdy. Kelesi aılarda zııatkerlik mektep muǵalimderi Bókeı orda aýdanyndaǵy S.Babajanov atyndaǵy bilim ordasyna barady.
Qaı salanyń bolsyn órkendeý jolynda mamandardyń bir-birimen pikir almasyp, tájirıbe bóliskeni asa mańyzdy. Osy oraıda, Nazarbaev zııatkerlik mektepteri bilim júıesindegi tıimdilikti bólisý is-sharalary – utymdy úrdis. Buǵan aýyldaǵy bilim oshaqtarynyń keri baılanys ornatýy men kórsetip jatqan nátıjeleri dálel bola alady.
Kemeldi keleshekke úlesker birden-bir tulǵa – ustaz desek, muǵalimder birin-biri tolyqtyryp, birge damýǵa tıis. Atalǵan joba oń nátıjesin berip jatyr. Aldaǵy ýaqytta ózge de ónegeli ister jalǵasyn tabaryna kámil senemin.
Álııa MAQSOTQYZY,
Oral qalasy fızıka-matematıka baǵytyndaǵy Nazarbaev zııatkerlik mektebiniń fızıka pániniń muǵalimi
