«Qazaqstan halqyna» qoǵamdyq qory eki jylda aımaqtyń densaýlyq saqtaý salasyna 2 mlrd teńge qarjy bólipti. Bul qarjyǵa oblystyq balalar aýrýhanasynda «Qamqorlyq» ońaltý ortalyǵy ashylyp, qymbat dári-dármekter alynǵan. Al skrınıng júrgizýge arnalǵan jyljymaly medısınalyq keshenniń quny – 1,1 mlrd teńge.
Qor dırektorynyń orynbasary Lázzat Shyńǵysbaeva oblystyq onkologııa ortalyǵynyń ujymyna jyljymaly medısınalyq keshenniń kiltin tabystap, qurylǵy shalǵaı eldi mekenderdegi turǵyndardy joǵary mamandandyrylǵan medısınalyq kómekpen qamtý kórsetkishin arttyryp, ortasha ómir súrý jasyn uzartýǵa múmkindik beretinin atap ótti. Japonııada jasalǵan eki kólikten turatyn jyljymaly medısınalyq keshen tomosıntez fýnksııasy bar sıfrly mammografııalyq jabdyqpen, sarapshylyq deńgeıdegi ýltradybystyq júıemen jáne joǵary dáldikpen zertteıtin kompıýterlik tomografpen jabdyqtalǵan.
Mamandar el óńirleri ishinen arnaıy tańdalǵan Almaty, Qyzylorda jáne Aqtóbe oblystarynda «QH Densaýlyq joly» jobasynyń iske asyrylýy onkologııalyq aýrýǵa shaldyqqandardy erte satyda anyqtaýǵa múmkindik beretinin aıtady. Halyqty onkologııalyq skrınıngpen qamtýdyń qazirgi josparly kórsetkishi 60% bolsa, joba arqyly ony 70%-ǵa deıin ulǵaıtý kózdelip otyr.
Qyzylorda
