Batys Qazaqstan oblystyq ardagerler keńesi, Qadyr Myrza Áli atyndaǵy oblystyq mádenıet jáne óner ortalyǵy jáne «Integral» jastar qoǵamdyq birlestigi uıymdastyrǵan saıysqa oblystyń ár aımaǵynan kelgen 13 aqsaqal qatysty.
– Qazaq «Jaqsy sóz – jarym yrys» deıdi. Barlyq oń nátıje, ıgi is áýeli durys nıetten, aq tilekten bastalady ǵoı. Tarıhymyzda sóz bastaǵan sheshen de, qol bastaǵan batyr da aqsaqaldyń batasyn almaı jolǵa shyqpaǵan. Sondyqtan da «Bataly ul arymas, batasyz qul jarymas» degen maqal qalǵan. Biz búgingi is-shara arqyly halqymyzdyń dana dástúrin jalǵastyryp, aǵa býyndy – bata berýge laıyq aqsaqal bolýǵa, jas býyndy – bata alýǵa laıyq azamat bolýǵa shaqyrǵymyz keledi, – deıdi oblystyq ardagerler keńesiniń tóraǵasy Maqsot Bergen.
Belgili aıtysker aqyn Baýyrjan Shırmedınuly ádemi júrgizgen baıqaýǵa Qazaqstan Jazýshylar odaǵy oblystyq fılıalynyń tóraǵasy, Ulttyq quryl-taıdyń múshesi Baýyrjan Ǵubaıdýllın bastaǵan qazylar alqasy jetekshilik etti. Qarııalardyń ózin ózi tanystyrýy, saıys shartyna saı tógilgen as batasy, alǵys batasy, toı batasy, sapar batasy sekildi aq tilekter ishki mazmunymen de, syrtqy sulýlyǵymen de kópshilikti terbeı tústi. Sózin qaǵazdan, tipti qalta telefonynan oqyǵan «zamanaýı» qarttar da kezdesti. Saıys sońynda qazylardyń ádil baǵalaýymen Tasqala aýdanynyń aqsaqaly Jumageldi Úmbetalıev birinshi orynǵa laıyq dep tanyldy. Aqjaıyqtyq aqyn Saǵyntaı Bısenǵalıev – ekinshi, Bókeı Ordasynan kelgen Tilegen Arystanbekov úshinshi oryndy jeńip aldy. Barlyq batagóıge dıplom men baǵaly syılyq buıyrdy. Syrymdyq Tóleý Sharıfýllın aqsaqal «Qurmetti ardager» tósbelgisin taqty.
– Bul óte mazmundy is-shara boldy. Mundaı tálimdi tárbıeni eshbir oqý orny almastyra almaıdy ǵoı. «Áke kórgen oq jonar, sheshe kórgen ton pisher» degendeı, ónegeli dástúrdi ómirsheń etý qolymyzda tur. Sondyqtan mundaı izgilikti is-sharalardy árdaıym qoldaımyz, – deıdi oblystyq qoǵamdyq damý basqarmasynyń basshysy Gúljanar Shókeeva.
Batys Qazaqstan oblysy
