Turǵyndar saýalyna jaýap berdi

Aımaqtaǵy 2020-2024 jyl­dar­ǵa arnalǵan ekologııalyq máselelerdi sheshýdiń jol kartasynda 52 is-shara kózdelse, búginde sonyń 20-sy oryndalypty. 23-i boıynsha ju­mys júrgizilip jatyr, al 9-ynyń oryndalýy keshiktirilgen.

Osy jyldyń III toqsanynda óńirdegi qatty turmystyq qal­dyq­tar kólemi 126,5 myń tonnaǵa jetip, onyń 34,2 myń tonnasy (27%) qaıta óńdelgen. Mınıstr Memleket basshysynyń Aral teńiziniń qurǵaǵan tabanyna sekseýil egý kólemin 5 jylda 1,1 mln gektarǵa ulǵaıtý jónindegi tapsyrmasynyń oryndalý barysyn da aıtyp ótti.

Kezdesý barysynda Qy­zyl­orda qalasynyń irgesin­degi kirpish jáne asfalt zaýyttarynyń ju­mysy, «Baıqońyr» keshenindegi ruqsat etilmegen aýmaqtardaǵy qal­dyq­tardy kádege jaratý týraly suraqtar qoıyldy. Sý tap­shylyǵynyń kishi Aral teńizine zardabyn aıtqan turǵyn­dar da boldy.

– Sý tapshylyǵynyń saldarynan qazir kishi Araldyń 60 pa­ıyzy balyq ýyldyryq shashýyna jaramsyz bolyp qaldy, – deıdi ıhtıolog Zaýalhan Ermahanov. – Osylaı jalǵasa berse, 4-5 jyl­dyq­ta teńizdegi balyq ataýlydan aıyrylamyz. Sondyqtan da tuzdy sýda tirshilik etýge beıim kam­bala glossa, kambala kalkan ba­lyqtaryn jersindirýdi bastap ketýimiz kerek. Bularǵa ke­zin­de bıologııalyq negizdeme ja­salǵan. Tek isti bastaý úshin Úki­met qoldaýy qajet. Bul – ba­lyq shar­ýashylyǵyn saqtap qalý­dyń bir­den-bir joly.

Bul saýalǵa baılanysty jaýapty qyzmet ókilderi teńizdegi balyq qory turaqty ekendigin aıtqanmen, mınıstr tájirıbeli maman pikirine qulaq asyp, usy­nys­ty talqylaýdy tapsyrdy.

Sapar barysynda mınıstr azamattardy jeke qabyldap, saýaldaryna jaýap berdi, usynys-tilekterin tyńdady. Sońynan BAQ ókilderi úshin brıfıng ótkizdi.

Qyzylorda