Ramazan Stamǵazıev – Rıshattyń ustazy. Ustazy da myqty, óziniń talaby da tas jaryp tur, búginde án bıigindegi talant. Qazaqtyń qara dombyrasyn bala kezden serik etken jas talant kóptiń kózine erterek tússe kerek. Jaqyn-jýyǵy jarqyraǵaly turǵan balany ónerge barýǵa keńesterin beredi. Sóıtip, 1996 jyly Jezqazǵan mýzykalyq kolledjine oqýǵa túsedi. Negiz bar, bilimin ármen jetildirý kerek, Almatydaǵy Qurmanǵazy atyndaǵy ulttyq konservatorııasyna attanady. Ult óneriniń úlken ustahanasynda 2000 jyldan 2004-ke deıin áıgili ánshi Ramazan Stamǵazıevten tálim alady. Kil myqtylardan án aıtýdyń, dombyra tartýdyń qyr-syryn meńgerip kelip, 2005 jyly Qalı Baıjanov atyndaǵy konserttik birlestik quramyndaǵy «Arqa sazy» folklorlyq ansambline qabyldanady.
Osy ýaqytta shabyty sharyqtaıdy. Qabyrǵaly óner ujymynyń qatarynda júrip respýblıkalyq baıqaýlarǵa qatysady. Júsipbek Elebekov, Qasym Amanjolov, Dánesh Raqyshev jáne taǵy da basqa tulǵalardyń atyndaǵy bedeldi konkýrstardyń laýreaty atanyp, bıyl ulttyq ónerge qosqan úlesi elenip, oblys ákiminiń «Jyldyń úzdik ánshisi» syılyǵyn aldy.
Ánshi keshiniń shymyldyǵyn Áset Naımanbaevtyń «Qońyr qazymen» túredi. Á degen bette kópshiliktiń aldynda kósilip sala berdi. Manarbek Erjanovtyń «Qoıshynyń ánin» de shyrqady.
Birshama ánnen keıin kezek qurmetti meımandarǵa berildi. Aqjarma tilekterin aıtyp, syılyqtaryn tartý etti. Shet aýdany ákiminiń quttyqtaýyn orynbasary Oral Zámirbekuly jetkizdi.
Aýdan ákimi Muhıt Muhtarov óz hatynda bylaı dep jazypty: «Sizdi biz ultymyzdyń bekzada óneri – dástúrli án murasyn dáriptep, halyq ánderin keıingi býynǵa nasıhattap júrgen kúmis kómeı, jez tańdaı ánshi, ulaǵatty ustaz, talantty jerlesimiz retinde tanımyz ári ónerińizdi joǵary baǵalaımyz. Búgingi ásem án keshińiz tyńdarmanyńyzǵa degen ystyq yqylasyńyz ben órnekti óner álemine degen adal ustanymyńyzdyń taǵy bir kórinisi dep bilemiz», delingen.
Keshtiń qurmetti qonaǵy Ramazan Stamǵazıev shákirtine aǵalyq lebizin bildirip, ánmen shashý shashty.
– Búgingi án keshine kelgenime qýanyp turmyn. О́ıtkeni ár dıqan ózi ekken dániniń jaıqalǵanyn, óskenin, óngenin kórgisi keledi. Rıshat Shábdenov te osydan pálenbaı jyl buryn menen sabaq alyp, qanatyn qaqqan edi. Búginde óner ólkesinde kósilip júr. Shákirtime uly hám qasıetti saparda tek sáttilik tileımin. Meniń synybyma túsken shákirtterdiń arasyndaǵy biregeıi boldy. Búginde ónerin súıgen halqyna arnap jatyr eken. Halqynyń batasy tısin, – dedi R.Stamǵazıev.
Kesh ıesi de shyǵarmashylyq keshin túıinder sátte eliniń aldynda aǵynan jaryldy.
– Bizdiń asyl muratymyz – ata-babadan jetken uly murany keleshek býynǵa óz bıiginde jetkizý. Sol úshin tynbaı eńbek etip kelemiz. Qadirmendi tyńdarman, án dep soqqan júrekterińizden aınaldym. Qazaqtyń óneri jasasyn! Ánimiz sharyqtaı bersin, – dedi R.Shábdenov.
Ánshiniń qushaǵy gúlge toldy. Iyǵyna túrli shapan da jabyldy. Bastysy, eliniń rııasyz qoshemetinen rahat aldy.
