Kollajdy jasaǵan – Qonysbaı ShEJIMBAI, «EQ»
Atyraý oblysynyń ákimi Serik Shápkenovtiń aıtýynsha, keıbir aýyldyń turǵyndaryn ınternetke qosylý jyldamdyǵynyń tómendigi alańdatady. Bul túıtkil sheńberinde baılanys operatorlarymen telekommýnıkasııa jelisin damytý jospary talqylandy. Oǵan «Qazaqtelekomnyń» basqarma tóraǵasy Qýanyshbek Esekeev pen salalyq mekemelerdiń ókilderi qatysty.
«Qazaqtelekom» AQ departament dırektory Ersaıyn Dúısemalıevtiń aıtýynsha, aımaqta 153 eldi mekenniń 134-i ınternet jelisimen qamtylyp otyr. Al 19 eldi mekenge ınternet jelisi qosylmaǵan. Basty sebep – turǵyndar sany 50 adamnan az. Endi bul aýyldardy 2024-2025 jyldary ınternet jelisine qosý josparlanǵan.
– Bıyl josparǵa sáıkes mys jelisin optıkalyq jelige aýystyrý jumysy júrip jatyr. Bul tutynýshylarǵa 500 Mbıt/s jyldamdyqpen ınternetke, ID TV teledıdary men sıfrlyq servısine, IR telefonǵa qosylýǵa múmkindik beredi. Atyraý qalasynda optıkalyq jelilerdiń úlesi 60 paıyzǵa, Qulsary qalasynda 10 paıyzdan 37 paıyzǵa deıin ulǵaıady. 2024 jylǵa bólingen qarjyǵa Aqjar, Talqaırań, Besikti aýyldarynyń abonentterin tolyq optıkalyq jelige aýystyrý josparlanyp otyr. Oblys ortalyǵynda 5500 abonent mys jelisinen optıkaǵa aýysady. Buǵan salynǵan ınvestısııa qarjysy – 162 mln teńge, – deıdi Ersaıyn Dúısemalıev.
Oblys ákiminiń pikirinshe, 3G bazalyq stansasy qosylmaǵan eldi mekenderdi ınternetpen qamtý úshin kompanııa men ákimdik arasynda birlesken baǵdarlama jasaý qajet. Al bilim berý jáne densaýlyq saqtaý mekemeleri kelesi jyly 100 paıyz optıkalyq jelimen qamtylýǵa tıis.
– Qazir sıfrlyq telekommýnıkasııalyq qyzmetterge suranys artyp otyr. Eldi mekenderdegi turǵyndardyń basym bóligi ınternet jelisi jyldamdyǵynyń tómendigine, keıbiri múlde joqtyǵyna jıi shaǵym aıtady. Biz de sapanyń jaqsarǵanyn qalaımyz. Oblysta 3G bazalyq stansasy qosylmaǵan 19 eldi meken bar. Bul eldi mekenderde abonent az shyǵar. Kompanııa úshin turǵyny az aýyldarǵa ınternet jelisin qosý tıimsiz bolar. Sol sebepti ákimdikpen birlesken baǵdarlama daıyndap, optıkalyq jelini júrgizýdi yjdaǵattaıyq, – dedi Serik Shápkenov.
Jıyn sońynda oblys ákimi S.Shápkenov pen «Qazaqtelekom» AQ basqarma tóraǵasy Q.Esekeev birlesken memorandýmǵa qol qoıdy. Qujatta óńirdegi baılanys pen ınternettiń sapasyn arttyrý máselesi qamtylǵan.
– Atyraý oblysyndaǵy jelilik ınfraqurylymdy damytý, turǵyndardy zamanaýı telekommýnıkasııalyq qyzmetpen, servıspen qamtamasyz etý, sondaı-aq 5G jelisin damytý jospary talqylandy. Qazir «Qazaqtelekom» kompanııalar toby munaıly óńirde besinshi býynnyń 8 bazalyq stansasyn ornatty. Endi jyldyń sońyna deıin taǵy 8 bazalyq stansany ornatý josparlanyp otyr. Kelesi jyly 5G bazalyq stansasynyń sany 40-qa jetkiziledi. Oblys turǵyndaryn jyldamdyǵy joǵary ınternetpen, sapaly baılanyspen qamtamasyz etý úshin jeliler jańǵyrtylady, – dedi Q.Esekeev.
Atyraý oblysy
