Áskerı qyzmetshiler alty aı ishinde «Shyǵys» sektorynda Úndi bitimgerlik batalonynyń quramynda tapsyrmalardy oryndady. Jaýapkershilik aımaqtarynda jaıaý, mobıldi jáne áýe patrýlderin júrgizip, tosqaýyl beketteriniń jumysyn uıymdastyrdy, bitimgerlik bazasyn kúzetip, beıbit kelisimderdiń saqtalýyn qamtamasyz etti.
Bitimgerlerdi Qorǵanys mınıstrligi Bitimgerlik operasııalar ortalyǵy bastyǵynyń orynbasary – shtab bastyǵy, polkovnık Baqytjan Jetpisov bastaǵan áskerı qyzmetshiler, sondaı-aq týystary men jaqyndary qarsy aldy.
– Sol óńirdegi qıyn jaǵdaıǵa qaramastan, bólimsheniń áskerı qyzmetshileri júktelgen mindetterdi laıyqty oryndap shyqty. Biz úıge jaqsy kóńil kúımen oraldyq. Alty aı ishinde keıbir áskerı qyzmetshilerimizdiń otbasynda sábıler de dúnıege keldi, – dedi bitimgerlik bólimshesiniń komandıri, kapıtan Farhat Aqbalıev.
Taıaý kúnderi Lıvan Respýblıkasynan kelgen bitimgerlerdiń ornyna Qarýly kúshterimizdiń onynshy bitimgerlik kontıngenti attanyp ketti. Esterińizge salsaq, «BUU-nyń Lıvandaǵy ýaqytsha kúshterindegi» mıssııasyna elimizdiń áskerı qyzmetshileri 2018 jyldyń qazan aıynan bastap qatysyp keledi. Osy ýaqyt ishinde 500-den astam áskerı qyzmetshi Lıvanda qyzmet etip, qajetti tájirıbe jınaqtady. Bul úrdis aldaǵy ýaqytta da jalǵasyn taba beredi. Sondyqtan Qorǵanys mınıstrligi Bitimgerlik operasııalar ortalyǵynyń bazasynda BUU bitimgerlik mıssııalaryna jiberý úshin áskerı baqylaýshylar men shtab ofıserleri laýazymdaryna taǵaıyndalatyn úmitkerler jıyndary únemi ótip otyrady.
Qazirgi kúni ótip jatqan kezekti jıynǵa Qarýly kúshterdiń ártúrli bólimshelerinen 17 áskerı qyzmetshi qatysyp jatyr. Onyń ekeýi – áıel áskerı qyzmetshi. BUU bitimgerlik mıssııalaryna qatysý úshin ofıserler qatań talaptar boıynsha tańdalady. Irikteý barysynda áskerı daǵdylar ǵana emes, sonymen qatar moraldyq-psıhologııalyq turaqtylyq, dene daıyndyǵy men shet tilderin bilýine de basa nazar aýdarylady.
Bir apta ishinde úmitkerler medısınalyq komıssııadan, psıhologııalyq testileýden ótedi. Dene shynyqtyrý normatıvterin tapsyryp, mehanıkalyq qoraby bar kólikti júrgizý daǵdylary men aǵylshyn tilin meńgerý deńgeıin kórsetedi.
Jıyn aıaqtalǵannan keıin irikteýden ótken áskerı qyzmetshiler odan ári BUU bitimgerlik mıssııalaryna jiberiletin ofıserler rezervine alynady. Áskerı baqylaýshylar men shtab ofıserlerin irikteý beıbitshilikti, turaqtylyq pen qaýipsizdikti saqtaýǵa baǵyttalǵan bitimgerlik qyzmet úrdisiniń mańyzdy kezeńi sanalady.
