Aımaqtar • 28 Qarasha, 2023

Baspanaly bolý baǵdarlamasy

274 ret

kórsetildi

1 mın

oqý úshin

Taraz qalasynda turǵyndardy qoljetimdi baspanamen qamtý boıynsha ońtaıly ıpotekalyq baǵdarlamalar júzege asyrylyp jatyr. Qazirgi kezde memlekettik qordan turǵyn úı kezeginde turǵan I, II toptaǵy múgedektigi barlar, kópbalaly otbasy, múge- dektigi bar bala asyraýshy otbasy, kámeletke tolǵanǵa deıin ata-analarynan aıyrylǵan jıyrma toǵyz jasqa tolmaǵan jetim balalar men ata-anasynyń qamqorlyǵynsyz qalǵan balalar sanatynda turǵan azamattarǵa arnalǵan «Baqytty otbasy» baǵdarlamasy aıasynda 460 páterge 4 mlrd teńge bólingen.

Tabıǵat MUSYLMANQUL

Búgingi tańda «Baqytty otbasy» baǵdarlamasynyń qatysýshylaryna 1,5 mıllıonǵa deıin turǵyn úı sertıfıkaty berilip jatyr. Al «Konsepsııa» baǵdarlamasy aıasynda 500 páterge 4 mlrd teńge qarastyrylǵan. Atalǵan páterler ınjenerlik qurylysy aıaqtalǵan soń konkýrsqa shyǵarylmaq.

Jergilikti atqarýshy bılik keltirgen derekke sensek, «7-20-25» memlekettik baǵdarlamasy aıasynda 523 páter rásimdelgen. 2020-2025 jyldarǵa arnalǵan «Nurly jer» turǵyn úı qurylysy memlekettik baǵdarlamasy aıasynda búginde 3 623 páterge satyp alý kelisimsharty jasalypty.

2023 jylǵa deıin jergilikti atqarýshy organdarda baspanaǵa muqtaj adam retinde úı kezeginde turǵan azamattarǵa arnalǵan «Nurly jer» baǵdarlamasynyń jańa baǵyty «Shańyraq» (5-10-20) baǵdarlamasy iske qosylyp, 751 otbasy baspanaly bolǵan. Sonymen qatar 2019 jyldan bastap úı kezeginde «Tolyq emes otbasy», «Kópbalaly otbasy», «Múgedektigi bar bala asyraýshy otbasy» sanatynda kezekte turǵan azamattarǵa arnalǵan «Baqytty otbasy» baǵdarlamasy boıynsha 288 otbasy úıli bolyp otyr.

TARAZ