Daýyldyń zııany
Atalǵan óńirde barlyq negizgi áleýmettik-ekonomıkalyq kórsetkishter boıynsha oń dınamıkaǵa qol jetkizilgen. Pavlodar oblysy elimizdegi búkil elektr energııasynyń 42,5%-yn jáne kómirdiń 60%-ǵa jýyǵyn óndiretini málim. Indýstrııaldy aımaqtyń qýat-qarymyn osydan-aq kórýge bolady.
«Oblystyń áleýmettik-ekonomıkalyq damý josparlary ulttyq jáne óńirlik strategııalarǵa, Memleket basshysynyń Joldaýyna sáıkes júzege asyrylyp jatyr. Desek te, áýeli 18-19 qarashada oblys aýmaǵynda 37 m/s ekpinmen tirkelgen daýyldy jeldiń zardaby jóninde aıtyp ótkendi jón sanadym. О́ńirdiń 3 qalasy men 6 aýdanynda 83 áleýmettik nysan, 63 kóppáterli jáne 84 jeke turǵyn úı zardap shekti. Baıanaýyl, Pavlodar, Sharbaqty, Maı, Ýspen, Aqqýly aýdandarynda 61 mektep, 10 aýrýhana, 9 mádenıet úıi jáne 3 sport kesheni túrli ahýalda búlindi, buzyldy. Sondyqtan tabıǵı sıpattaǵy jergilikti aýqymdaǵy «Tótenshe jaǵdaı» jarııalandy. Keltirilgen zaqym men shekken zııandy baǵalaý júrgizildi. Búlingen nysandardy qalpyna keltirý jumystaryn jyldyń 5 jeltoqsanyna deıin aıaqtaý josparlanǵan», dedi A.Baıhanov.
Este bolsa elektrmen jabdyqtaý jelilerinde 246 avarııalyq ajyratý men 100-den asa zaqymdaný saldarynan 117 aýyldyq eldi meken jaryqsyz qalǵan edi. Áıtse de birinshi kúni jaryq 99 aýylǵa berildi, qalǵan tıisti jumystar jedel atqarylyp bolǵan soń 22 qarashada elektrmen jabdyqtaý tolyǵymen qalpyna keltirildi.
Investısııa ákelgen ıgilik
Tartylǵan ınvestısııalar kólemi ótken jyldyń osy kezeńimen salystyrǵanda 28,2%-ǵa ósip, 730,1 mlrd teńgeni qurady. Onyń 85%-y – jeke ınvestısııalar. Onda 32 jobany iske asyrýǵa jáne 1 500-ge jýyq jumys ornyn ashýǵa múmkindik berdi. Áli jyl sońyna deıin 800-ge jýyq jańa jumys ornymen qamtamasyz etetin 291 mlrd teńgege 20 jobany iske qosý josparda bar.
«Strategııalyq mańyzdy jobalardyń qatarynda kelesi jyldyń birinshi jartysynda iske qosý josparlanyp otyrǵan Ekibastuz mańyndaǵy ferroqorytpa zaýytynyń qurylysy tur. Bul zaýyt Qazaqstanǵa Qytaıdan keıin (240 myń tonna) ferroqorytpalardyń iri óndirýshisi bolýǵa múmkindik beredi. Jalpy, óńirlik bıliktiń jumysynda 9,7 myń jańa jumys ornyn qurýǵa múmkindik beretin 2,1 trln teńge somasyna 127 ınvestısııalyq joba bar», dedi oblys ákimi.
Aımaq eldegi 5 kóshbasshy oblystyń qatarynda turǵanmen, ókindiretin tustary da joq emes. Abaılap aıtqanda, atmosferany lastaý boıynsha da Kereký óńiri aımaqtar arasynda aldyńǵy lekte ekeni jasyryn emes. Osy oraıda oblysta keshendi ekologııalyq sheshimderge birtindep kóshý jumystary nyqtap júrgizilip jatyr. Osy jyldyń 9 aıynda bul kórsetkish 2,6%-ǵa nemese 13,2 myń tonnaǵa azaıypty.
Sharýanyń máselesi sheshilgen
О́ńirde aýyl sharýashylyǵy qarqyndy damyp keledi. Egistik alqaby 1,650 myń ga qurady, bul ótken jylǵy deńgeıden 80 myń ga artyq. Oblys fermerleri úshin aǵymdaǵy maýsym ońaı bolǵan joq. Aýa raıynyń qolaısyzdyǵy keri áserin tıgizdi.
«Osyǵan baılanysty fermerlerdi qoldaý jáne qurǵaqshylyqtyń saldaryn azaıtý úshin barlyq qajetti shara qabyldandy. Birinshi – jergilikti bıýdjetten fermerlerdiń jemshóp daıyndaýǵa jumsaǵan shyǵyndarynyń qunyn arzandatý úshin 3 mlrd teńge bólindi. Bul memlekettik kómekti 1,5 myńnan asa fermer aldy. Ekinshi – shóp shabý úshin arzandatylǵan dızel otynynyń kólemi 4-ten 10 myń tonnaǵa deıin kóbeıdi. Arzan baǵa – 232 teńge, bul dızeldiń naryqtyq qunynan 21%-ǵa tómen. Úshinshi – shóp daıyndaý úshin memlekettik orman qory jerlerinen aýdany 25 myń gektardan asatyn qosymsha shabyndyq alqaptar bólindi. Bul shamamen 20 myń tonna shóp daıyndaýǵa múmkindik berdi. Tórtinshi – «Pavlodar» ÁKK janynan maldy qolda ustaıtyn kezeńde halyqqa satý úshin 5 myń tonna kóleminde jemdik astyqty turaqtandyrý qory quryldy. Besinshi – Úkimettiń qoldaýymen respýblıkalyq bıýdjetten ınvestısııalyq shyǵyndardy, tuqymdardy, pestısıdterdi, tyńaıtqyshtardy, mal sharýashylyǵy boıynsha asyl tuqymdy jáne seleksııalyq jumystardy sýbsıdııalaýǵa 6,8 mlrd teńge bólindi», dedi óńir basshysy.
Áleýmettiń ál-aýqaty kóterildi
Oblysta «Aýyl amanaty» jobasy aıasynda isin jańadan bastaǵan kásipkerler 1,5 mlrd teńgege 192 shaǵyn nesıe alyp, 350 jańa jumys orny ashylǵan.
«О́ńirdiń agrarlyq bıznesin ártaraptandyrý bizge áleýmettik mańyzy bar azyq-túlik taýarlarynyń baǵasyn baqylaýǵa kómektesedi. Azyq-túlik taýarlarynyń 19 pozısııasyndaǵy 14-iniń baǵasy respýblıkalyq baǵadan tómen. Sondaı-aq jumyspen qamtý jáne jańa jumys oryndaryn ashý – basty mindetterimizdiń biri. Prezıdent ár 10 myń turǵynǵa jyl saıyn 100 jumys ornyn ashýdy mindettedi. Osy jyldyń 10 aıynda 26 533 adam jumys ornyn tapty. 63 kásiporyn 57 myń qyzmetkeriniń eńbekaqysyn kóterdi», dedi A.Baıhanov.
«Jaıly mektep» jobasymen Pavlodarda 1 200 jáne 600 oryndyq eki mekteptiń qurylysy bastalǵan.
«О́ńirdiń iri ónerkásiptik kompanııalarynyń qarajaty esebinen apatty mektepterdiń máselesi sheshildi. Bıyl Jelezın aýdanynyń Moıseevka jáne Baıanaýyl aýdanynyń Qarajar aýyldarynda 2 jańa mektep salyndy. Úshinshi jańa mektep osy jyldyń sońyna qaraı Pavlodar aýdanynyń Sychevka aýylynda ashylady. О́ńirde barlyǵy 6,5 mlrd teńgege 54 mektep jańartyldy. Shaǵyn aýyldardyń balalaryn tasymaldaý úshin 46 mektep avtobýsy satyp alyndy», dedi óńir basshysy.
Bıyl 20 densaýlyq saqtaý nysanyna kúrdeli jóndeý júrgizilip, 400 birlik medısınalyq tehnıkalar men jabdyqtar satyp alynypty. Jańartylǵan 37 birlik sanıtarlyq kólik osy jylǵy jaraqtandyrý kórsetkishin 51%-dan 68%-ǵa deıin ulǵaıtqan. Sporttyq ınfraqurylymdy damytý, onyń barlyq halyq úshin qoljetimdiligin arttyrý jumystary qarqyn alǵan. 6 dene shynyqtyrý-saýyqtyrý kesheni, jekpe-jek ortalyǵy salyndy, 198 sport alańy ornatyldy. 14 nysanda aǵymdaǵy jáne kúrdeli jóndeý jumystary júrgizildi. Oblystyń 3 qalasynda 22 mlrd teńgeden asa qarajatqa 128 km jylý jelileriniń qurylysy, qaıta qurý jáne aǵymdaǵy jóndeý jumystary júrgizildi. «Aýyl – el besigi» jobasy boıynsha 35 myń adam turatyn 26 aýyldyń ınfraqurylymy jańartyldy.
Oblys ákimi Ekibastuz qalasyn jylý berý maýsymyna daıyndaý máselesine jeke toqtaldy.
«Ekibastuz JEO-daǵy 10 qazandyq agregattyń altaýyna kúrdeli jóndeý jáne ekeýine aǵymdaǵy jóndeý júrgizildi. JEO shtattyq rejimde jumys istep tur jáne jylýdyń qajetti parametrlerin berip jatyr. Qalǵan eki qazandyq boıynsha jumystar aıaqtaldy. Osy aıdyń sońyna deıin iske qosý, baptaý jumystary júrgiziledi. JEO jóndeýge 17 mlrd teńge bólindi, onyń ishinde bıýdjetten 8,5 mlrd jáne «OAEK» AQ qarajaty esebinen 8,5 mlrd. Bıyl Ekibastuz qalasynda JAO men «OAEK» AQ qarajaty esebinen 70 shaqyrymnan asa jylý jelileri jóndeldi. Búgingi tańda barlyq jumys aıaqtaldy. Qalanyń jylýmen jabdyqtaý jelilerin jóndeýge barlyǵy 5,1 mlrd teńge bólindi, onyń ishinde 2,1 mlrd teńge oblystyq bıýdjet qarajaty, al 3 mlrd teńgeni «EJE» JShS menshik ıeleri bóldi», dedi A.Baıhanov.
О́ńirde sýmen jabdyqtaý máselelerine kóp kóńil bólinedi. 18,4 mlrd teńgege 60 jobany iske asyrý júrgizilip jatyr. Oblys qalalaryndaǵy kórsetkishti bıyl 97%-ǵa, aýyldarda 98,8%-ǵa deıin jetkizý josparlanǵan. Al turǵyn úıdiń qoljetimdiligi men sapasy ózekti ári basym baǵyttardyń biri bolyp qala beredi. Áleýmettik turǵyn úıdiń kezegin azaıtý úshin qalalarda 1,551 páterli 14 kóp qabatty turǵyn úı salyndy. Buǵan qosa Pavlodar oblysynda jergilikti joldar jelisin damytý jónindegi memlekettiń basym mindetin eskere otyryp, 27 mlrd teńgege jalpy uzyndyǵy 692 km bolatyn eldi mekenderdiń avtokólik joldary men kóshelerin qaıta jańartý jáne jóndeý boıynsha 141 joba iske asyryldy.
