– Shý qalasy men 10 aýdan ortalyǵyna aerofototúsirilim júrgizý jumysynyń mańyzy zor ekeni anyq. О́ıtkeni qazir aqparattyq júıeniń dáýreni júrip tur. Sondyqtan da biz belgilengen josparǵa sáıkes Taraz qalasy men aýdan ortalyqtaryndaǵy qurylys jumystary júrgizilgen aýmaqtyń ınjenerlik ınfraqurylymyn túgendeý jumystaryn ýaqtyly atqardyq. Jyl buryn halyq sany bes myńnan asatyn eldi mekenderdegi 4 886 gektar aýmaqtyń ınjenerlik júıelerine túgendeý jumystaryna jergilikti bıýdjetten qarajat bólindi. Qolǵa alǵan jumys der kezinde iske asyryldy, – dedi oblystyq sáýlet jáne qala qurylysy basqarmasynyń basshysy Aıtqazy Qarabalaev.
Onyń aıtýynsha, halyq sany 5 myńnan asatyn eldi mekenderdi aqparattyq júıege engizý jumysy osy jyly da sátimen jalǵasqan. Qolǵa alynǵan jumys ýaqtyly júzege asyrylǵan eken. Nátıjesinde, 6011,95 gektar aýmaqtyń ınjenerlik júıesi tolyqqandy zerdelengen. Osylaısha, aýdandardaǵy jumystar ýaqtyly ári sapaly aıaqtalǵan. Al Taraz qalasy boıynsha qolǵa alynǵan is jyl sońyna deıin támamdalmaq.
A.Qarabalaev keltirgen derekke júginsek, «Sıfrlandyrý, ǵylym jáne tehnologııalyq serpilis» ulttyq jobasyn iske asyrý boıynsha da birqatar jumys atqarylǵan. Qala qurylysy kadastrynyń sıfrly josparly negizin qurý úshin eldi mekenderdiń qurylys jumystary júrgizilgen aýmaǵynyń ınjenerlik-ınfraqurylymdyq júıeleri tolyqtaı geodezııalyq-topografııalyq zerdeleýden ótedi. Bul jumystyń mańyzy zor.
– Oblys boıynsha barlyǵy 371 eldi mekenniń 12-siniń qala qurylysy jobalaryn sıfrlandyrý jumystary birneshe jyl buryn «Qazgısa» JShS tarapynan júzege asqan bolatyn. Bıyl qalǵan eldi mekenderdiń bas josparyn sıfrlandyrý josparlanyp, qazirgi kúnge 355 eldi mekenniń jobasy geoportalǵa engizildi. Qalǵan 4 eldi mekenniń bas josparyn sıfrlandyrý jumystary aldaǵy kúnderi aıaqtalmaq. Talas aýdanyna qarasty Kóshek batyr aýylynyń ońtaılandyrylǵan syzbasyn ázirleý jumystary aýdan ákimdigi tarapynan atqarylyp jatyr. Atalǵan jumys aıaqtalǵan jaǵdaıda oblys boıynsha barlyq eldi mekenniń bas jospary oblystyń geoportalyna 100 paıyz engizilmek, – dep naqtylady basqarma basshysy.
A.Qarabalaevtyń aıtýynsha, osy jyldyń basynda aerofototúsirilim jumysyna qajetti qarajat qarastyrylyp, konkýrs negizinde merdiger bolyp «Qazgısa» JShS anyqtalǵan. Seriktestik mamyr aıynda Jańatas, Qarataý jáne Shý (Tóle bı aýyly) qalalaryna aerofototúsirilim jumysyn júrgizgen. Zańnama talaptaryna sáıkes Qorǵanys mınıstrliginiń kameraldyq qaraýynan ótip, kelisim alynǵan. «Salaǵa qatysty sıfrlandyrý jumysy josparǵa sáıkes iske asyrylyp jatyr. Taıaýda Baýyrjan Momyshuly, Qordaı, Moıynqum, Merki, Qulan, Asa, Sarykemer aýyldaryna ushqyshsyz ushý apparaty aerofototúsirilim jumysyn júrgizdi», dedi basqarma basshysy.
Jambyl oblysy
