16 jastaǵy balanyń kásip ashýyna «Táýelsizdik urpaqtary» jobasy yqpal etken. Sonyń aıasynda mektep oqýshysy qaıtarymsyz grant retinde 1 mln teńge qarjyǵa ıe bolyp, otbasylyq kásipti ilgeriletýge úles qosqan. Qazirgi tańda Berik shaǵyn ǵana sheberhanada ertoqymnan bastap, júgen, noqta, úzeńgi syndy atqa qajetti jabdyqtardyń bárin daıyndaýmen aınalysady. Sonyń ishinde ertoqymy kóptiń suranysyna ıe. Olardyń jalpy 30-40 túri bar bolsa, tapsyrysqa baılanysty kez kelgenin ázirleýge mashyqtanǵan.
Atadan balaǵa mıras bolyp kelgen bul kásiptiń damýyna Beriktiń ákesi Madııar Nurbekov, basqa da aǵaıyndy baýyrlary qoldaý bildiredi. Bir jumysty júıeli túrde júrgizip jatqany olardyń qanynda bar ekenin Berik óz sózinde tilge tıek etti.
– Bul kásippen aınalysý bizdiń qanymyzda bar. Men es bilgeli ákem bul ónerdi janyna serik etken. Al ákeme deıin meniń atalarym osy jolda eńbektengen jandar bolypty. Sondyqtan áýletimiz úshin bul – tańsyq jumys emes. Qazirgi ýaqytta elimizdiń ár túkpirinen tapsyrys kóp túsedi. Ertoqym daıyndaǵanda aldymen sapasyna mán beremiz. Sodan bolar, biz – el boıynsha myqty sheberlerdiń qataryndamyz, – deıdi mektep oqýshysy Berik Ájibaı.
Qannan daryǵan kásipti ıgergen jas sheber ákesiniń qasynda júrip at ábzelderin ázirleýdiń qyr-syryn meńgergen. Keıin osy isti dóńgeletýdi jón sanap, jobasyn «Táýelsizdik urpaqtary» bastamasy arqyly damytýdy kózdegen. Nátıjesi jaman emes. Qaıtarymsyz granttyń kómegimen bıznesi órge domalap, tapsyrys aýqymy arta túsipti.
– Joba aıasynda utqan 1 mln teńge qarajat otbasylyq kásibimizdiń damýyna kóp yqpal etti. О́ıtkeni kóktem, jaz mezgilderinde tapsyrys azaıady. Shyǵyn shyǵatyn kezder de bolady. Osynyń ornyn jabýǵa jáne sapaly bylǵary alýymyzǵa granttyń kómegi kóp tıdi. Materıaldyń jaqsy bolǵany ertoqymdy satyp alýshylardyń da kóńilinen shyqty. Osylaısha, tapsyrystyń sany ýaqyt ótken saıyn arta tústi, – dep jas kásipker memlekettiń qoldaýyn erekshe atap ótti.
Beriktiń bul joba týraly Qarasaı aýdandyq jastar resýrstyq ortalyǵynan habardar bolǵan. Ortalyq jastary memlekettiń osyndaı utymdy bastamalaryn aýdan kóleminde dáripteýden qalys qalǵan emes. Olar memleket usynǵan baǵdarlamalardy jastar arasynda nasıhattap, jańashyldyqqa bastaıdy.
Berik mektep oqýshysy bolǵandyqtan, isin sabaqtan keıin jalǵastyrady. Túske deıin bilim alsa, tústen keıin sheberhanadaǵy mindetin oryndap, ákesi men baýyrlaryna kómektesedi. Beriktiń endigi armany – atasynyń jolyn qýyp, osy kásipti joǵary deńgeıde damytyp, úlken seh ashý.
– Jambyl oblysy, Moıynqum aýdanynda atamnyń atqa qajetti jabdyqtardy daıyndaıtyn úlken sehy bolypty. Men de atam sııaqty osy bıznesimdi odan ári jetildirip, aýqymy keń ǵımaratta jumys istegim keledi. Sóıtip, qolóner salasyn kópke tanystyryp, ony jan-jaqty damytsam deımin. Bir jaǵynan eldiń ekonomıkasyn arttyrýǵa qosqan úlesim bolar edi, – deıdi keıipkerimiz.
Beriktiń atakásipti jetildirýine sebepker bolǵan «Táýelsizdik urpaqtary» dep atalatyn joba áli de jalǵasyp jatyr. Bul bastama Memleket basshysynyń qoldaýymen júzege asyp keledi. Resmı derekke súıensek, byltyr atalǵan jobanyń aıasynda Almaty oblysynda 10 jas kásipker 1 mln teńgeden qarjylaı qoldaýǵa ıe bolǵan. Qazirgi ýaqytta olar ár salada óz kásibimen aınalysyp, jemisin kórip júr.
2023 jyly «Táýelsizdik urpaqtary» boıynsha 3 mln teńgeden 30 grant berilý kózdelgen. Jobanyń maqsaty – belsendi shyǵarmashyl jastar qaýymdastyǵyn qalyptastyrýǵa baǵyttalǵan jastardyń jańa jáne qoldanystaǵy bastamalaryn memleket tarapynan qoldaý. Konkýrsqa 14 jastan bastap, 35 jasqa deıingi azamattar úmitker bola alady.
Dıdar MÁLIKULY,
jýrnalıst
Almaty oblysy,
Qarasaı aýdany
