Sınoptıkterdiń aıtýynsha, jeltoqsan aıynda Qazaqstanda aýa temperatýrasy normadan 1-2 gradýsqa joǵary bolady dep kútiledi.
“Jeltoqsanda jyldyń eń uzaq túnderi men eń qysqa kúnderi baıqalady. Aýa temperatýrasynyń tómendeýi jalǵasady. Kaspıı teńiziniń shyǵys jaǵalaýynda ortasha aılyq aýa temperatýrasy burynǵysynsha oń, +1 gradýsqa deıin, respýblıkanyń qalǵan bóliginde ońtústik-batys pen ońtústikten 0 - 5°S soltústikke jáne shyǵysqa qaraı -13-18°C gradýsqa deıin tómendeıdi. Eń tómengi ortasha aılyq aýa temperatýrasy Shyǵys Qazaqstan oblysynyń soltústik-shyǵysynda baıqalady, aýa temperatýrasy -20-24°S quraıdy”, delingen habarlamada.
Soltústik oblystarda, ońtústik-shyǵys aımaqtaǵy taý eteginde jáne ońtústiktiń taýly aımaqtarda qar jamylǵysynyń ortasha bıiktigi jeltoqsannyń aıaǵynda 10-20 sm-ge jetedi. Eń joǵary qar jamylǵysy elimizdiń shyǵysyndaǵy taýly aımaqtarda baıqalady. Bıiktigi shamamen – 25-66 sm deıin jetedi. Al Mańǵystaý oblysynyń ońtústiginde múlde qar jaýmaıdy dep kútiledi.
Qańtarda aýanyń ortasha aılyq temperatýrasy Qazaqstan boıynsha normadan 2 gradýsqa joǵary bolady dep kútilýde.
Qańtardaǵy jaýyn-shashyn mólsheri respýblıkanyń basym bóliginde normaǵa jaqyn, Batys Qazaqstan, Atyraý, Shyǵys Qazaqstan oblystarynda, Aqtóbe, Qostanaı, Soltústik Qazaqstan, Aqmola oblystarynyń basym bóliginde, elimidiń shyǵys bóliginde normadan kóp bolady dep kútiledi.
Aqpan aıynda da respýblıka boıynsha ortasha aılyq aýa temperatýrasy normadan 2 gradýsqa joǵary bolady.
Aqpan aıynda jaýyn-shashyn mólsheri respýblıkanyń basym bóliginde normadan joǵary, Abaı oblysynda, Shyǵys Qazaqstan, Almaty, Jetisý oblystarynda, Jambyl oblysynyń basym bóliginde, Qaraǵandynyń ońtústik-shyǵysynda normadan joǵary túsedi.
