Kezdesý «ArselorMıttal Temirtaý» AQ Kómir departamentiniń alańynda ótti. Is-sharaǵa Qaraǵandy oblysynyń ákimi Ermaǵanbet Bólekpaev, kásipodaq uıymdarynyń ókilderi men óńirdiń kenshileri, jalpy 200-ge jýyq adam qatysty.
Svetlana Jaqypova óz sózinde Memleket basshysynyń 2023 jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyn iske asyrý maqsatynda zııandy eńbek jaǵdaılarynda jumys isteıtin adamdardy áleýmettik qorǵaý deńgeıin arttyrý úshin arnaıy áleýmettik tólemdi engizýdi kózdeıtin zańnamaǵa túzetýler toptamasy ázirlengenin atap ótti. Májilis tıisti zań jobasyn qabyldady jáne Parlament Senatynyń qaraýyna joldandy.
«Arnaıy áleýmettik tólemderdi taǵaıyndaý úshin 55 jasqa tolý jáne BJZQ-da keminde 7 jyl kásiptik zeınetaqy aýdarymdarynyń bolýy kerek. Arnaıy áleýmettik tólem birneshe komponentten turady jáne tórt qarajat kózinen júzege asyrylady: respýblıkalyq bıýdjetten 2 eń tómen kúnkóris deńgeıi mólsherinde arnaıy kásiptik járdemaqy; ómirdi saqtandyrý jónindegi kompanııalardan 1 eń tómen kúnkóris deńgeıi mólsherinde; jumys berýshilerdiń qarajaty esebinen 1 eń tómen kúnkóris deńgeıi mólsherinde, BJZQ-dan mindetti kásiptik zeınetaqy jarnalary esebinen. Budan basqa, jumyskerlerge BJZQ-daǵy zeınetaqy jınaqtaryn eskere otyryp, mindetti zeınetaqy jarnalary esebinen tólemder alý quqyǵy beriledi», dedi Svetlana Jaqypova.
Áleýmettik kodekske sáıkes jumys berýshiler kásipteri men qyzmet túrleri Eńbek jaǵdaılary zııandy jumystarmen aınalysatyn jumyskerlerdiń, óndiristerdiń, jumystardyń, kásipterdiń tizbesine engizilgen jumyskerler úshin mindetti kásiptik zeınetaqy jarnalaryn aýdarady, olardyń 2 myńnan astam pozısııasy bar. Osylaısha, arnaıy áleýmettik tólem ekonomıkanyń 19 salasynda, onyń ishinde taý-ken óndirý jáne óńdeý ónerkásibinde jáne basqalarynda jumys isteıtin Qazaqstan azamattaryna tıesili bolady.
Mınıstr tólem zeınetkerlik jasqa deıin tólenetinin atap ótti. Arnaıy áleýmettik tólemderdi alý úshin eńbek jaǵdaılary zııandy jumystarmen aınalyspaýǵa tıis. Jumyskerler jeńil jumysqa aýysa alady, sodan keıin olar jalaqy men tólem alady nemese demalysqa shyǵyp, zeınetke shyqqanǵa deıin arnaıy áleýmettik tólemder alady.
Biryńǵaı jınaqtaýshy zeınetaqy qorynyń derekteri boıynsha arnaıy áleýmettik tólemdi taǵaıyndaý úshin mindetti sharttardy eskere otyryp, oǵan 2024 jyly 37 myńnan astam jumysker, 2025 jyly – 42 myńnan astam, 2026 jyly – 47 myńnan astam jumysker úmitker bola alady. Osylaısha, áleýetti tólem alýshylar sany jyl saıyn ulǵaıady.
«Aldyn ala derekter boıynsha, 2024 jyly arnaıy áleýmettik tólemniń ortasha mólsheri jalpy alǵanda 208 myń teńgeden asady. Árbir jumysker úshin tólem mólsheri BJZQ-daǵy jınaqtarǵa baılanysty bolady. Bul rette jyl saıyn arnaıy áleýmettik tólem mólsheri eń tómen kúnkóris mólsheriniń ulǵaıýyna baılanysty ósedi», dedi Svetlana Jaqypova.
Sondaı-aq zańnamalyq túzetýler boıynsha jumyskerdi eńbek mindetterin oryndaý kezinde jazataıym oqıǵalardan mindetti saqtandyrý júıesin jetildirý kózdeledi, atap aıtqanda:
- ómirdi saqtandyrý kompanııalarynyń aldyn alý sharalaryna jumsaǵan shyǵystaryn tólengen saqtandyrý syılyqaqysynyń 6 %-na deıin óteýi;
- ómirdi saqtandyrý kompanııalarynyń ońaltý sharalaryna jumsaǵan shyǵystaryn tólengen saqtandyrý syılyqaqysynyń 6%-na deıin óteýi;
- ómirdi saqtandyrý kompanııalarynyń zardap shekken jumyskerdi sanatorıı-kýrorttyq emdelýin 100 aılyq eseptik kórsetkishke deıingi mólsherde tóleýi;
- jazataıym oqıǵa nátıjesinde keltirilgen zııandy óteý (saqtandyrý tólemi) mólsherin aıqyndaý kezinde jumyskerdiń kinásin boldyrmaý.
Kezdesýde Svetlana Jaqypova kenshilerdiń suraqtaryna tolyqqandy jaýap berip, kezdesýden keıin buqaralyq aqparat quraldarynyń ókilderi úshin brıfıng ótkizdi.
