Mamandardyń aıtýynsha, birqazandar Tobyl óńirinen qyrkúıekte ushyp ketedi eken. «Al myna qus ábden álsirep qalǵan bolsa kerek. Qanattylarǵa órkenıet damýy da keri áser etedi. Búginde adamzat balasy qustar álemin de jaýlap alyp jatyr desek bolady. Aqıqatyn aıtsaq, olar bizdiń jerge kirip jatqan joq, álimsaqtan beri ózderi baýyr basqan ystyq mekenine kelip qonady. Bul – solardyń jeri», deıdi Arystan.
Qoryqshynyń aıtýynsha, birqazan áldenemen aýyryp nemese jaralanyp qalǵan bolýy kerek. Onyń ústine, iri qus shekten tys maı jınap, semirip alsa da, uzaq jolǵa ushýǵa jaramaı qalady eken. Munyń naqty sebebin aldaǵy ýaqytta mamandar anyqtaıtyn bolady.
Birqazan – negizinen balyqty qorek etetin qus. Táýligine bir kıloǵa deıin balyq jeıdi degen derek bar. Sondyqtan erikti jastar da qoryqshynyń bir jaǵyna shyǵyp, Qostanaıdan balyq satyp alyp jiberip jatyr.
Qazir birqazan Arystannyń eski de bolsa, jyly asúıinde qamaýly tur. «Bul iri qus qoı. Sondyqtan ári-beri erkin júretin keń ári jaıly oryn bolsa, qanaty tez qataıady. Almatyda sondaı oryndar bar eken. Jaqyn jerden jyly voleri, jaǵdaıy bar adamdar habarlasyp qala ma degen úmit te joq emes. Eń bastysy, qusqa kóktemge deıin qamqorlyq kerek. Kómektesetin eshkim tabylmasa, ebin taýyp, jaǵdaıyn jasap, jyly kúnge ózim-aq jetkizermin», deıdi qoryqshy.
Qostanaı oblysy
