Bastaýyn 2003 jyly sol kezderdegi Ishki áskerlerdiń áskerı bólimderinen alǵan «Jas búrkit» áskerı-patrıottyq qozǵalysy 20 jyldyq belesti artta qaldyrdy. Osyǵan baılanysty Ulttyq ulan bas qolbasshylyǵy mereıli kezeńde atqarylǵan jumystarǵa toqtalyp, eńbegi men erligin aıryqsha atap ótti. Ulttyq ulan bas qolbasshysynyń tárbıe jáne áleýmettik-quqyqtyq jumystar jónindegi orynbasary, general-maıor Qaırat Úmbetov «Jas búrkit» qozǵalysy sheńberinde áskerge deıingi jastarmen kezdesý, ashyq esik kúnderin ótkizý, ózge de is-sharalar uıymdastyrylyp kele jatqanyn basa aıtty.
– 2003-2023 jyldar aralyǵynda mektep bitirgen «Jas búrkit» músheleri arasynda ómirin áskerı salamen baılanystyrǵandary da kóp. Búginde Ulttyq ulanda jáne basqa kúshtik qurylymdarda «Jas búrkitten» shyqqan 100-den asa óren abyroımen qyzmet atqaryp keledi, – dedi general-maıor Q.Úmbetov.
Minberge kóterilgen Ulttyq ulannyń bas qolbasshysy, general-leıtenant Erkin Botaqanov «Jas búrkit» áskerı-patrıottyq qozǵalysynyń 20 jyldyǵymen quttyqtady.
– Jıyrma jyldyń ishinde «Jas búrkit» áskerı-patrıottyq synyptary elimizdiń búkil óńirlerinde ashylyp, osy baǵyttaǵy jumystyń nátıjeli júrgizilip jatqanyn maqtanyshpen aıta alamyz, – dedi general-leıtenant E.Botaqanov.
«Jas búrkit» áskerı-patrıottyq qozǵalysynyń eń kishkentaı múshesi, jeti jasar Omar Qoıshybek qozǵalysqa kórsetip júrgen qamqorlyǵy úshin Ulttyq ulannyń bas qolbasshysyna klýbtyń atrıbýtyn tabystady. Balalardyń qolynan arnaıy atrıbýt alǵan Májilis depýtaty Maksım Rojın de sóz sóıledi.
– General-leıtenant Erkin Botaqanov qyzmetshi Arman Ahashovty teginnen-tegin atap ótken joq. «Jas búrkittiń» alǵash qurylǵan kezindegi ol kisiniń eńbekterimen tanyspyz. Jemisti jumystardyń nátıjesi de kóńil qýantady. Mine, búgin men de jasym qyryqqa kelgenine qaramastan «Jas búrkit» qataryn tolyqtyryp otyrmyn. Men úshin bul – úlken qurmet. Elimizde áskerı dástúrlerdiń qalyptasyp kele jatqany baıqalady. Ásirese búgingideı kezeńde munyń mańyzy zor. Qazaq halqy úshin sarbazdardyń saqadaı saı bolýy, olardyń namysty ári jigerli bolýy da mańyzǵa ıe, – degen depýtat babalar ómirinen de mysaldar keltirdi.
– Elimizde mektepten tys 1745 úıirme jumys isteıdi. Ol jerlerde mıllıondaǵan balǵyn tárbıelenip jatyr. Olardyń baǵyt-baǵdary da ártúrli. Ǵylym men tehnologııa, beıneleý óneri, mýzyka jáne áskerı-patrıottyq tárbıe sekildi baǵyttar boıynsha oqyp-úırenip júr. Sonyń ishinde áskerı-patrıottyq tárbıe memlekettik deńgeıde basymdyqqa ıe. Biz dál osy baǵytta jas patrıottardy tárbıelep, qalyptastyryp kelemiz. Sondyqtan qoǵam úshin «Jas búrkit» synyptary men klýbtarynyń paıdasy orasan, – dedi Oqý-aǵartý mınıstrliginiń ókili Raısa Sher.
5573 jáne 6636 áskerı bólimderiniń «Jas búrkit» áskerı-patrıottyq qozǵalysynyń tárbıelenýshileri óz ónerlerin kórsetip, is-sharanyń árin kirgizdi.
«Men klýbta naǵyz jigitterge tán qasıetterdi boıyma sińirip júrmin. Mundaǵy jetekshilerimiz bizge jaýyngerlerdiń is-qımylyn, qarý-jaraqtaryn kórsetedi. Osynda kelgeli kóp dúnıeni úırendim. Sol úırengenderimizdi sahnada kórermenderge kórsettik. Bolashaqta men de áskerı salada qyzmet etkim keledi. Men elimdi qorǵaýǵa ázirmin», dedi «jas búrkitshi» Á.Nuǵymash.
Qazirgi ýaqytta Ulttyq ulannyń áskerı bólimderiniń qoldaýymen 59 mektep pen 3 kolledjde jalpy sany 108 «Jas búrkit» áskerı-patrıottyq synyby ashylǵan. Sondaı-aq áskerı bólimder aýmaǵynda 33 sporttyq áskerı-patrıottyq klýby jumys isteıdi. Mundaǵy tárbıelenýshilerdiń jalpy sany 2500-ge jýyq. Olar úshin arnaıy sabaq kesteleri túzilgen. Oqýshylar sabaqtardyń nátıjesinde áskerı salaǵa beıimdelip, ómirge qajet dúnıelerdi meńgeredi.
Janbolat KENJEǴUL
