Eki kezeńde júrgizilgen jattyǵýda aldymen muzdyń ústinde kóligimen bara jatqan adamdy qutqarý jumystary qalaı júrgiziletini kórsetildi. Tótenshe oqıǵa aýyzsha emes, Pestroe kóliniń ústinde is júzinde júzege asyryldy. Kelesi kezeńde qutqarýshylarǵa shartty túrde jolda soǵysqan «GAZel» men jeńil kóliktiń apatynda bolýy múmkin qıyn jaǵdaıdy eńserý júkteldi. Syrtqa shyǵa almaı qalǵan jeńil kólik júrgizýshisin qutqarý ońaı bolǵan joq. Jaǵdaı kóliktiń otqa oranýymen kúrdelene tústi. Apat ornyna jedel jetken TJ qutqarýshylary, órt sóndirýshilerdiń kezekshi qaraýyly órtti jyldam sóndirdi. Qamalyp qalǵan adam salonnyń artqy esiginen shyǵarylyp, oǵan dárigerlik kómek kórsetildi.
Sondaı-aq Pestroe kóline jaqyn ornalasqan ormanda jedel-qutqarý jasaǵynyń mamandary jergilikti polısııa qyzmeti jáne Ulttyq ulannyń 6637 áskerı bóliminiń áskerı qyzmetshilerimen birlesip, joǵary ótimdi TREKOL tehnıkasynyń 3-eýin paıdalana otyryp, adasqan adamdy izdestirý-qutqarý jumystaryn júrgizdi. Kınologtiń járdemimen adasqan adam tez tabylyp, oǵan medısınalyq kómek kórsetildi. Jattyǵý kezinde tótenshe jaǵdaı saldarynan zardap shekkenderdi kól jaǵasyndaǵy shatyrly lagerge ornalastyrý boıynsha is-sharalar da pysyqtaldy. Olardy tirkeýden jáne alǵashqy medısınalyq kómek kórsetýden bastap, tamaqtaný men túneýdi uıymdastyrýǵa deıingi is-sharalardyń tolyq kesheni qamtamasyz etildi. Osyndaı mańyzdy iste Qyzyl Krestiń oblystyq fılıaly men saýda jáne tamaqtaný qyzmetiniń qyzmetkerleri úlken ról atqarady. Jergilikti jerde kommýnıkasııalardy uıymdastyrý úshin oblys ákimdiginiń, «Qazaqtelekom» AQ qyzmetkerleriniń kómegimen 3 telefon nómiri uıymdastyrylyp, baılanys pýnkti ashyldy. Tájirıbelik is-sharalar oblystyń aýyldyq aýdandarynda da ótkizildi, bul rette avtojoldardaǵy shartty TJ jáne kommýnaldyq jáne energetıkalyq jelilerdegi apattardy joıýǵa, zardap shekkenderge kómek kórsetýge basa nazar aýdaryldy. Qurylysy tolyq aıaqtalmaǵan 9 qabatty úıdiń aýmaǵynda órt kezinde turǵyndardy qutqarý ssenarııi de júzege asyryldy.
Oqý-jattyǵýlarda birneshe oqıǵa qamtylyp, olardyń bárine qutqarýshylar birneshe kún daıyndaldy. TJD baspasóz qyzmetiniń ókili Evgenıı Jýravlevtiń málimdeýinshe, mundaı jattyǵýlar elimizdiń ózge de aımaqtarynda ótkizilgen. Búgingi tańda qutqarýshylardyń jalpy sany 34 myńdaı adam kúshinen jáne 12 myń túrli tehnıkadan turady.
Soltústik Qazaqstan oblysy
