Úndeý mátini áleýmettik jelide jarııalandy.
"Qurmetti Qasym-Jomart Kemeluly! Núkenova Saltanattyń týǵan-týystary men jaqyndary qyzymyzdyń qaıǵyly ólimine qatysty qylmystyq isti tergeý barysynda ádildiktiń saqtalýyn qadaǵalaǵanyńyz úshin sizge erekshe alǵysyn bildiredi.
Degenmen, kúdiktiniń týystary olardyń baılanystary men materıaldyq jaǵdaıy Bıshimbaevqa taǵy da jazadan qutylýǵa múmkindik beretinin ashyq aıtyp otyr.
Belgili bolǵandaı, burynǵy ulttyq ekonomıka mınıstri Qýandyq Bıshimbaev sybaılas jemqorlyq jasady degen aıyppen 10 jylǵa bas bostandyǵynan aıyrylyp, biraq 2 jyldan keıin shartty túrde bosatyldy.
Bizdiń qazirgi jaǵdaıda da onyń jaqyn týystary – sonyń ishinde anasy Nurlybekova Almıra Baltabaıqyzy ulyn bostandyqqa shyǵaryp, qylmystyq jazadan alyp tastaý úshin barlyq ádister men joldardy, sonyń ishinde aqshany paıdalanýy múmkin degen negizdi pikirimiz bar. Birqatar kompanııalardyń basshysy, sonymen qatar birneshe kommersııalyq múlikterge ıe bola otyryp, ol orasan zor qarjylyq kúshke ıe”, – delingen ákeniń hatynda.
Núkenovanyń ákesiniń pikirinshe, memlekettik qyzmetshilerdiń kirisi men múlki týraly deklarasııa sybaılas jemqorlyqpen kúreste múldem dármensiz. Onyń aıtýynsha, Bıshimbaev zańsyz jolmen alynǵan múlikterin anasyna tirkep qoıǵan.
"Sybaılas jemqorlyqqa qarsy ulttyq bıýro 19 qazan kúni sybaılas jemqorlyqqa qatysy bar degen kúdikke ilingen burynǵy ulttyq ekonomıka mınıstri Qýandyq Bıshimbaevtyń isine qatysty málimdeme jasady. Tergeýdiń málimetinshe, atyshýly is boıynsha aıyptalýshylardyń kópshiligi óz kinásin moıyndap, memleketke 1,2 mıllıard teńge kóleminde shyǵyndy ótegen.
Alaıda eks-mınıstr Qýandyq Bıshimbaevtyń anasy Almıra Nurlybekova bul sózben kelispeıdi. Bul týraly ol informburo.kz saıtyna bergen suhbatynda aıtty. Jemqor sheneýniktiń anasynyń aıtýynsha, Almıra Nurlybekova balasyna qaryzǵa aqsha bergen, onyń rastaıtyn qujattary bar.
Osy jerde suraq týyndaıdy: A.Nurlybekova kommersııalyq jyljymaıtyn múlik obektilerin, sándi kólikterin, jalpy quny ony dollarlyq mıllıonerler qataryna qosatyn sonshama kóp aqshany qaıdan alǵan?”, – delingen úndeýde.
Onyń pikirinshe, Bıshimbaevtyń anasynyń barlyq múlki ulynyń halyqtan urlaǵan sybaılas jemqorlyq aqshasyna satyp alynǵan bolýy múmkin.
"Joǵaryda aıtylǵandarǵa súıene otyryp, suraımyn:
- Ekonomıkalyq tergeý basqarmasyna tekserý júrgizip, Nurlybekova Almıraǵa jáne Bıshimbaev Q-nyń barlyq jaqyn týystaryna tıesili múliktiń shyǵý kózin anyqtaýdy tapsyrsyn.
- Nurlybekova A.B.nyń múlikteri zańsyz qarajatqa satyp alynǵany rastalǵan jaǵdaıda Qazaqstan Respýblıkasy Qylmystyq kodeksiniń 218-baby boıynsha qylmystyq is qozǵalsyn;
- qylmystyq jolmen alynǵan barlyq múlikti memleket paıdasyna tárkileý máselesi kóterilsin”, – delingen hatta.
