Jylyjaıdyń ashylýyna «Ekologıka» qoǵamdyq qory qoldaý bildirdi. Qor basshysy Tatıana Tegaıdyń aıtýynsha, bul – «Teńizshevroıl» kompanııasynyń áleýmettik baǵdarlamalar ınvestısııasy aıasyndaǵy «Jasyl mektep» jobasymen ashylǵan alǵashqy jylyjaı. Endi munda alýan túrli gúl men kókónisti ósirý josparlanyp otyr. Jobaǵa 3-9-synyptardyń 380 oqýshysy qatysady.
«Atyraý oblysyndaǵy túıtkildi máseleniń biri – ekologııa. Sol sebepten, mundaı ınnovasııalyq ári jasyl joba ózge mektepterde qolǵa alynýy kerek. Maqsat – oqýshylardy qorshaǵan ortany qorǵaýǵa jumyldyryp, ekologııalyq taza kókónister ósirýge yntalandyrý», deıdi oblystyq bilim basqarmasynyń basshysy Erlan Slambekov.
«Ekologıka» qoǵamdyq qorynyń basshysy Tatıana Tegaıdyń deregine qaraǵanda, bul jobany iske asyrýdyń birneshe maqsaty bar. Aldymen mektepterde ekobilim berýdi engizý kózdelgen. Sondaı-aq bilim ordalary janynan jylyjaı uıymdastyrý josparlanǵan. Endi mundaı joba ózge mektepterde de qolǵa alynýy múmkin.
«Teńizshevroıl» JShS ekologııa bóliminiń bas menedjeri Ronda Ioderdiń málimetinshe, «Teńiz» ken ornynda qaldyqtardyń 35 túri óńdeledi. Al óńdelgen qaldyqtardyń 44 paıyzyn qaıta paıdalaný múmkindigi bar.
«Qoqysty qaıta óńdeý de paıda ákeledi. Sol sebepten, «Jasyl mektep» jobasyna qatysýshy balalar jınaıtyn, suryptaıtyn bótelkeler men qaǵazdar da kádege asady. Ekolog retinde balalardyń tabıǵatty qorǵaýǵa degen shynaıy qyzyǵýshylyǵyn baıqadym», deıdi Ronda Ioder.
Ekologter balalarǵa jylyjaı men ósimdik sharýashylyǵyn júrgizý, sý men energııany únemdeý, qaldyqtardy qaıta óńdeý negizderin úıretti. Dáris tyńdaǵan balalar 38 kılo qaǵaz qaldyǵy men 20 kılo plastıkalyq bótelke jınady.
Atyraý oblysy
