«Benfıkanyń» azýly qarsylas ekeni daýsyz. Olar Portýgalııa chempıonaty, el kýbogi jáne el sýperkýboginiń árqaısysynyń bas júldesin 8 retten oljalady. 2010 jyly ÝEFA Chempıondar lıgasynda top jardy. Kezinde alty ret tórtkúl dúnıeniń teńdessiz oıynshysy dep tanylǵan Rıkardınonyń dál osy lıssabondyq klýbtyń sapynda jasyndaı jarqyldaǵanyn jankúıerler jaqsy biledi. Desek te «Qaırat» ta osal emes. Jerlesterimiz 2013 jáne 2015 jyldary Chempıondar lıgasyn eki ret utyp, sol kezderi Qurlyqaralyq kýbokti ıeledi. Odan basqa da tolyp jatqan ataqtarymyz taǵy bar.
Prıshtınadaǵy báseke «Benfıkanyń» basymdyǵymen ótti. 4 jáne 5-mınýttarda kózdi ashyp-jumǵansha Afonsý Jesýz pen Dıego Nýnes qatarynan eki gol soqsa, 8-mınýtta Dáýren Tursaǵulov esep aıyrmashylyǵyn qysqartty. Sol kezde keýdemizde úmit oty jylt etti. Biraq 11-mınýtta Lýsıý Rosha mergendik tanytty. Osy oraıda ekinshi jáne úshinshi goldyń Igıtanyń óreskel qateligi saldarynan qaqpamyzǵa engenin aıta ketýimiz kerek. Bes ret álemniń eń úzdik golkıperi bolyp tanylǵan ol alǵashynda óz aıyp alańynda qarsy jaqtyń oıynshysyn aldap ótemin dep opyq jedi. Ekinshi ret qaqpadan tym uzap ketti. Bul múmkindikti «Benfıkanyń» serkeleri qalt jibermedi. Kezdesýdiń aıaqtalýyna tórt mınýt qalǵanda Dener nysanany dál kózdedi. Odan árige almatylyqtardyń shamasy jetpedi. Esep – 2:3.
«Benfıkaǵa» qarsy oıyndaǵy sátsizdikten keıin-aq «Qaırattyń» «Tórttik fınalynan» shet qalǵany belgili boldy. Sebebi ár topta birinshi oryn alǵan komanda ǵana kelesi jyldyń kókteminde shymyldyǵy túriletin maýsymnyń basty dodasynda kúsh synasý qurmetine ıe bolady. Al Marlon Velasko baptaǵan ujymǵa ondaı baq buıyrmady. Qazaqstannyń fýtzalshylary óner kórsetken G tobynda portýgalııalyq klýb ozdy.
