Dúbirli dop dodasy Germanııa quramasynyń jarqyn jeńisimen aıaqtaldy. Toptyq týrnırde Meksıka (3:1), Venesýela (3:0) jáne Jańa Zelandııany (3:1) utqan olar 1/8 fınalda AQSh-ty (3:2), ¼ fınalda Ispanııany (1:0) jáne jartylaı fınalda Argentınany (3:3, penaltıden 4:2) jeńdi. Sheshýshi tusta Fransııamen 2:2 esebimen teń oınady. Bul matchta alǵashqy eki dopty nemister soqqan edi. Sol goldardyń avtorlary – Parıs Brýnner men Noa Darvıh. 53-mınýtta Saımon Býabr esep aıyrmashylyǵyn qysqartty. 69-mınýtta Vınners Osave qyzyl qaǵaz alyp, alańnan qýyldy. Bul múmkindikti fransýzdar qalt jibermeı, arada biraz ýaqyt ótkennen keıin Matıs Amýgý tarazy basyn teńestirdi – 2:2. Al penaltı soǵý barysynda Shteffen Froınd baptaǵan komandanyń baǵy jandy – 4:3. Sóıtip, Germanııanyń jas órenderi óz tarıhynda tuńǵysh ret álem chempıonatynyń bas júldesin oljalady.
Úshinshi oryn úshin tartys Argentına men Malı quramalary arasynda órbidi. Pablo Aımardyń shákirtteri osy kezdesýdiń favorıtteri sanalǵanymen, qara qurlyqtyń ókilderi olarǵa des bermedi. Malılikter básekeniń basynan tizgindi qolǵa alyp, Ibraım Dıarra men Mamadý Dýmbııa birinshi taımda nysanany dál kózdese, úzilisten keıin Amıdý Makalý kezdesýdiń sońǵy núktesin qoıdy – 0:3. Sóıtip, Malı fýtbolshylary qola medaldi moınynda jarqyratty.
Osy jarysta О́zbekstan quramasy da sátti óner kórsetkenin aıta ketýge tıispiz. Toptyq týrnırden irkilmeı ótken «ala taqııalylar» 1/8 fınalda azýly Anglııadan 2:1 esebimen aılasyn asyrdy. Shırek fınalda olar Fransııadan bir ǵana dop aıyrmashylyǵymen utyldy – 0:1. Desek te jer-jahannyń jalyndy jastary jınalǵan jarysta úzdik segiz komandanyń qatarynan kóriný ózbekter úshin zor mártebe ekeni anyq.
