Dúbirli dodanyń ashylý rásiminde «Elimizde shahmattyń damýyna memlekettik deńgeıde qoldaý kórsetilip keledi. El Prezıdenti Qasym-Jomart Toqaev qazirgi qoǵamǵa ıntellekti joǵary, tereń oılaıtyn adamdar qajet ekenin únemi aıtady. Shahmat – aqyl-oıdy damytýshy dara oıyn. «Konaev Cup» týrnıri Qazaqstandaǵy shahmatty damytýda úlken ról atqarady. Osyndaı mańyzdy jarystardy uıymdastyrý halyqtyń sportqa degen qyzyǵýshylyǵyn arttyratyny sózsiz. Qazirgi kezde Qonaev qalasy iri sporttyq sharalardy ótkizý arqyly álemdik sport juldyzdaryn shoǵyrlandyratyn ortalyq retinde tanylyp keledi», dedi Almaty oblysynyń ákimi Marat Sultanǵazıev.
Osy saltanatty is-shara barysynda oblys basshysy jaqynda ǵana Italııadaǵy álem chempıonatynda kúmis júldeger atanǵan Elnaz Qalıahmetti quttyqtady. Al Qazaqstan shahmat federasııasynyń vıse-prezıdenti Marat Esenov sporttyń osy túriniń damýyna baryna úles qosyp júrgen Almaty oblysynyń azamattaryna óz rızashylyǵyn bildire otyryp: «Búgin biz birinshi kezekte shahmat oıynynyń qundylyǵyn taǵy bir kórsetý úshin jınalyp otyrmyz. 2019 jyly Qazaqstan álemdik shahmat astanasy atanyp, sol kezde elimizde komandalyq álem chempıonaty uıymdastyryldy. Sodan beri respýblıkamyzda túrli halyqaralyq jarys ótkizip, bizdiń órenderimiz AQSh, Ispanııa, Ázerbaıjan, Úndistannyń úzdik oıynshylarymen teń dárejede óner kórsetti. Búgingi týrnırge keler bolsaq, ekinshi jyl qatarynan sańlaqtar Qonaev qalasynda bas qosyp otyr. Bul – jas sportshylarǵa ózderin jaqsy qyrynan kórsetý úshin týyndap otyrǵan tamasha múmkindik», dep atap ótti.
Atalǵan jarystyń chempıondyq ataǵyn eń tańdaýly 12 grossmeıster sarapqa saldy. 11 kezeńge sozylǵan saıystyń qorytyndysy boıynsha bas júlde men 500 myń teńgelik aqshalaı syılyqqa AQSh-tan at terletip kelgen grossmeıster Tımýr Gareev ıe boldy. Ol – eki birdeı Olımpıadaǵa qatysqan saqa oıynshy. Ekinshi jáne úshinshi oryndy ázerbaıjandyq Výgar Rasýlov pen qazaq shahmatshysy Azamat О́teǵalıev ıelense, úzdik bestikti armenııalyq Manýel Petrosıan men ırandyq Bardııa Deneshvar túıindedi.
