Jyraqtaǵy Japonııaǵa Qazaqstannyń 20 dzıýdoshysy attandy. Aralarynda Olımpııa men Azııa oıyndary, álem jáne qurlyq chempıonattarynda atoı salǵan sańlaqtar da boldy. Basqa balýandardy da osal dep aıta almaımyz. Olardyń barlyǵy – ulttyq qurama sapynda talaı baıraqty básekede baq synap, úlken tájirıbe mektebinen ótken tastúlekter. Soǵan qaramastan senim artqan tulymdylar men burymdylarymyzdyń eshqaısysy da senim údesinen shyǵa almady. Sózimiz salmaqty bolý úshin tómendegi derekterge nazar aýdaraıyq.
Nurqanat Serikbaev (60 kg), Asqar Narqulov (73 kg), Abylaıhan Jubanazar (81 kg), Aıdar Arapov pen Ermahan Ánýarbekov (90 kg), Bekarys Sádýaqas (100 kg) jáne Ǵalymjan Qyryqbaı (+100 kg) tusaýkseker kezdesýlerinde tize búkti. Ǵusman Qyrǵyzbaev pen Nurzat Sálimbaev (66 kg), Danııa Shamshaev (73 kg), Rýslan Musaev (81 kg) jáne Nurlyhan Sharhan (100 kg) ekinshi beldesýinde súrindi. Al Eldos Smetov (60 kg) brazılııalyq Mıshel Aýgýsto men túrikmenstandyq Aıbek О́mirovten basym túskenimen, ıtalııalyq Karlıno Andreodan aılasyn asyra almady. Erasyl Qajybaı (+100 kg) da dál sol mejege jetti. Alyptarmen aıqasqan qandasymyz amerıkalyq Fılıp Horıýchı men ırandyq Iаsh Gangasty jyqqanymen, álem jáne qurlyq chempıony, Eýrazııa oıyndarynyń jeńimpazy, reseılik Inal Tasoevtan jeńildi.
Qyzdarymyz da qaryq qylmady. Alǵashqy aınalymda Ábıba Ábýjaqynova (48 kg) taıpeılik Lın Chen Haodan, Ekaterına Tokareva (70 kg) reseılik Mádına Taımazovadan, Nazgúl Maratova fransııalyq Koralı Haımnan (+78 kg) utyldy. Ekinshi kezeńde Ǵalııa Tynbaeva (48 kg) Fransııanyń dzıýdoshysy Blandın Ponǵa, Esmıgúl Kýıýlova (63 kg) reseılik Kamıla Badýrovaǵa ese jiberdi. Burymdylar arasynan eń táýir nátıjege Kámıla Berliqash qol jetkizdi. Ol jubanysh básekelerine qatysyp, osy jarysty jetinshi orynmen qorytyndylady.
Jalpy komandalyq esepte erler arasynda Japonııa quramasy aldyna jan salmady. Jarys qojaıyndary 3 altyn, 3 kúmis jáne 1 qola medaldi oljalady. Ekinshi orynda – Reseı. Olar 2 altyn men 4 qolany qorjynǵa saldy. Tórtinshi jáne besinshi satyǵa Ońtústik Koreıa (1+1+0) men Ázerbaıjan (1+0+2) jaıǵasty. Úzdik bestikti Grýzııa (0+1+1) túıindedi. Áıelder saıysynda da Kúnshyǵys eliniń (4+3+2) qyzdary qarsylas shaq keltirmedi. Ekinshi oryndy Brazılııa (1+1+0) ıelendi. Úshinshi jáne tórtinshi oryndy Kanada men Nıderland (1+0+1) ózara bólisse, Fransııa quramasy (0+2+0) besinshi satyǵa turaqtady. Al Tokıoda tas-talqan bolyp utylǵan Qazaqstannyń balýandary qalyń toptyń arasynda qalyp qoıdy. Otandyq dzıýdoshylarymyzdyń japon jerinde ótken jarystaǵy kúresine qarap, olardyń jer-jahannyń myqtylary jınalǵan dúbirli dodalarǵa daıar emes ekenin ańǵardyq. Dál osyndaı jigersiz ári súreńsiz ónermen alysqa barmaıtynymyz anyq. Al Parıj Olımpıadasynyń bastalýyna bar-joǵy jeti aıdan asa ýaqyt qaldy. Bul másele el sportynyń basshylary men respýblıkalyq federasııanyń tizginin ustaǵan azamattarǵa oı salýǵa tıis. Áıtpese, Fransııanyń astanasynda da jer sıpap qalýymyz ábden múmkin.
Tokıodaǵy «Grand Slam» týrnıri japon balýandarynyń jeńisimen aıaqtalǵanyn joǵaryda aıttyq. Máselen, eki salmaq dárejesiniń bas júldesin jergilikti dzıýdoshylar ózara sarapqa saldy. Aqtyq synda álem chempıonatynyń eki dúrkin qola júldegeri Rıýdzıý Nagaıama (60 kg, erler) Tokıo Olımpıadasynyń jeńimpazy, Rıo Olımpıadasynyń qola júldegeri, tórt dúrkin álem chempıony Naohısa Takatoǵa tize búktirse, Mıký Takashı (63 kg, áıelder) Kırarı Iаmagýchıden basym tústi. Al 60 kg salmaqta Olımpııa oıyndarynyń jeńimpazy, tórt dúrkin álem chempıony Hıfýmı Abe qarsy kelgenderdi qoǵadaı japyrsa, 52 kg salmaqta saıysqa túsken onyń týǵan qaryndasy Ýta Abe de altynnan alqa taqty. 23 jastaǵy Ýtanyń qol jetkizgen tabystary aǵasynan esh kem emes.
Ázerbaıjan quramasyna jalǵyz altyndy syıǵa tartqan Hıdaıat Geıdarovqa da arnaıy toqtala ketsek, esh aıyby joq. Sebebi 26 jastaǵy balýan bizge bóten emes. Ol Qaraǵandyda dúnıege keldi. Ǵasyrlar toǵysynda áke-sheshesi tarıhı otanyna qonys aýdardy. Kaspıı jaǵalaýynda júrip, dzıýdonyń qyr-syryna qanyqqan Hıdaıat ýaqyt oza kóptegen bıik belesterdi baǵyndyrdy. Onyń álem chempıonatynyń úsh dúrkin qola júldegeri, Eýropanyń úsh dúrkin chempıony, Eýropa oıyndary men Dúnıejúzilik ýnıversıadanyń júldegeri degen ataqtary bar. Sonymen qatar qazirgi kezde Geıdarov 73 kg salmaq dárejesi boıynsha dúnıejúzilik reıtıngte jeke-dara kósh bastap tur.
