Áleýmettik jelide órtenip jatqan kóliktiń ishindegi adamdy qutqarǵan er adamnyń vıdeosy tarady. Atalǵan oqıǵa 2023 jyly 3 jeltoqsanda Astana qalasynda bolǵany anyqtaldy. Júrgizýshini qutqarǵan áskerı qyzmetker ekeni belgili boldy.
Qorǵanys mınıstrligi baspasóz qyzmetiniń málimetinshe, vıdeodaǵy áskerı qyzmetshi - Meırambek Ysqaqov vzvod serjanty, 68665 áskerı bóliminiń jaýyngerlik jáne dene shynyqtyrý nusqaýshysy.
"2023 jyldyń 3 jeltoqsanynda keshki ýaqytta Meırambek Ysqaqov dúkenge shyqqan. Janyp jatqan avtokólikti kórgen áskerı qyzmetshi oqıǵa týraly elordadaǵy Tótenshe jaǵdaılar departamentiniń 101 ortalyǵyna shuǵyl habarlaıdy. Dereý qımyldaǵan áskerı qyzmetshi janyp jatqan kóliktiń ishinde adam bar ekenin ańǵaryp, ony qaýipsiz jerge alyp shyǵady. Bul ýaqytta er adam esinen tanyp qalady. Alǵashqy medısınalyq kómek kórsetken Meırambek azamatty oqıǵa ornynan kelgen jedel járdem qyzmetkerlerine tapsyrady. Júrgizýshi № 1 qalalyq aýrýhanaǵa jetkizildi", – deıdi vedomstvonyń baspasóz qyzmeti.
Aıta keteıik, áskerı qyzmetshiniń áreketine ótip bara jatqan azamattardyń biri de at salysypty.
"Joǵary qolbasshylyq áskerı qyzmetshini marapatqa usyndy. Áskerı qyzmetshi Meırambek Ysqaqov jubaıy ekeýi Samıra jáne Lýnara esimdi qyzdardy tárbıelep ósirip otyr", – delingen habarlamada.
