Forýmǵa Senat depýtaty Aqmaral Álnazarova, Qazaqstan halqy Assambleıasy janyndaǵy respýblıkalyq Analar keńesiniń tóraǵasy Nazıpa Shanaı, zııaly qaýym ókilderi, eńbek ardagerleri men kópbalaly analar qatysty. Barlyq óńirdegi Analar keńesiniń tóraǵalary men músheleri, aýdandardaǵy áıelder keńesteriniń músheleri onlaın rejimde qosyldy.
Ortalyq ǵımaratynda aımaqtyń ónerli qyz-kelinshekteri jasaǵan ónimderden kórme uıymdastyrylyp, túıe jáne eshki sútinen jasalǵan tabıǵı sabyn, ulttyq kıimder men áshekeıler, túrli tehnıkalarmen salynǵan kartınalar jáne ózge de erekshe buıymdar qoıyldy.
Forýmda oblys ákimi Nurlybek Nálibaev jýyrda ǵana Qyzylorda qalasynda qoldanysqa berilgen zamanaýı ári kópfýnksııaly «Anaǵa taǵzym» ortalyǵy qyz-kelinshekterdiń rýhanı ordasyna aınalǵanyn atap ótti. Oblysqa jumys saparymen kelgen Memleket basshysy Qasym-Jomart Toqaev salt-dástúrimizdi nasıhattap, ulttyq qundylyqtar qadirin aıqyndaıtyn ortalyqqa joǵary baǵa bergen.
– «Anaǵa taǵzym» ortalyǵy – balaýsa qyz baladan ardaqty asyl ájege deıin bas qosatyn tárbıe mektebi. Osy jerde aqyldy da parasatty analardyń, ınabatty kelinderdiń ónegeli isinen, salmaqty sózinen úlgi alatyn jastar qatary kóbeıeri sózsiz. Búginde turmystyq qıyndyqqa tap bolǵan analar men balalarǵa qoldaý kórsetý maqsatynda 7 aýdan men Qyzylorda, Baıqońyr qalalarynda «Baqytty otbasy» bólimderi ashyldy.
Ortalyqtarda zańgerlik jáne psıhologııalyq kómek kórsetýden bastap, kásipkerlik negizderge oqytý, bıznes-jospar qurýǵa, grant nemese shaǵyn nesıe alýǵa qujat rásimdeýge járdemdesý, jumysqa ornalastyrý jáne ózge de baǵyttarda qyzmetter kórsetiledi. Oǵan qosymsha 114 jedel áreket etý toby quryldy. Bul top ómirlik qıyn jaǵdaıǵa tap bolǵan otbasylarǵa der kezinde járdem berý úshin jasaqtaldy, – dedi aımaq basshysy.
Qazaqstan halqy Assambleıasy janyndaǵy respýblıkalyq Analar keńesiniń tóraǵasy Nazıpa Shanaı «Mádenıetti ana – mádenıetti ult» jalpyulttyq jobasy týraly baıandap, onyń erekshelikterin tanystyrdy.
Mańyzy erekshe is-sharada Pavlodar oblysy ákiminiń áıelder isteri jónindegi keńesshisi, ulaǵatty ustaz, «Qurmet» ordeniniń ıegeri Baqytjamal Maksılova, Túrkistan oblysyndaǵy Ata-analar odaǵynyń tóraǵasy Aqbaıan Jaqypova, «Qazaqstan barysy-2022» jeńimpazy Maqsat Isaǵabylovtyń anasy Roza Qýańbaeva, Qyzylorda oblysynyń qurmetti azamaty Almagúl Bojanova taqyryp aıasynda oı-pikirin bildirdi.
Respýblıkalyq forýmda álemdik dodalarda el namysyn qorǵaǵan sportshylardy, óner baıqaýlarynda dara shyqqan daryndardy dúnıege ákelgen analar, oblystyń áleýmettik-ekonomıkalyq damýyna úles qosqan qyz-kelinshekter túrli atalymdar men marapattaldy. Úsh dúrkin «Altyn dombyra ıegeri» Muhtar Nııazovtyń anasy Jumakúl Ońǵarbaevaǵa, Álem chempıonatynyń eki dúrkin kúmis júldegeri Qamshybek Qońqabaevtyń anasy Ulbosyn Alypqashovaǵa, «Qazaqstan barysy-2022» Maqsat Isaǵabylovtyń anasy Roza Qýańbaevaǵa kóp aldynda osyndaı qurmet kórsetildi.
Eki kúndik baǵdarlama aıasynda forýmǵa qatysýshylar «Anaǵa taǵzym» ortalyǵymen tanysyp, túrli kezdesýge qatysty, tájirıbe almasty.
Qyzylorda
