Hattamada Bala quqyqtary týraly konvensııada bekitilgen quqyqtar buzylǵan kezde balalardyń nemese olardyń ata-analarynyń (zańdy ókilderiniń) shaǵymdaryn qaraý tetikteri belgilenedi. Onyń qorytyndysy boıynsha ázirlengen usynymdar memleketke tıisti sharalar qabyldaý úshin beriledi.
Sondaı-aq senatorlar aldaǵy beısenbide «2010 jylǵy 9 jeltoqsandaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgeris engizý týraly hattamany ratıfıkasııalaý týraly» zańdy qaraıdy. Bul zań tıisti salada saýda-ekonomıkalyq yntymaqtastyqty damytýǵa arnalǵan.
Bıýro otyrysynda azamattyq qorǵanys júıesin jetildirý máselelerine arnalǵan parlamenttik tyńdaýǵa daıyndyq barysy da talqylandy. Osy is-shara aıasynda Halyqaralyq qatynastar, qorǵanys jáne qaýipsizdik komıtetiniń senatorlary Astanada ótetin bıik ǵımarattardaǵy órtterdi sóndirý jattyǵýlaryna qatysady.
Senat tóraǵasy Máýlen Áshimbaev memleket tarapynan bul baǵytta tıisti sharalar qabyldanyp jatqanyn, soǵan qaramastan áli de bolsa sheshimin tappaǵan mańyzdy máseleler bar ekenin atap ótti.
«Keıingi jyldary memleket azamattyq qorǵanys júıesin jetildirý máselesine basymdyq berip keledi. Senattyń salalyq komıteti de aıtarlyqtaı jumys atqaryp keledi. Degenmen, áli de sheshimin tappaı kele jatqan máseleler bar. О́tken aptada Almaty qalasynda bolǵan órt saldarynan 13 adam qaza tapty. Osy rette qaza tapqandardyń jaqyndaryna qaıǵylaryna ortaqtasyp, kóńil aıtamyz jáne zardap shekkenderdiń tezirek saýyǵyp ketýlerin tileımiz. Aldaǵy ýaqytta osyndaı qaıǵyly oqıǵalar qaıtalanbasy úshin bul baǵytta belsendi jumys isteýimiz kerek», dedi Máýlen Áshimbaev.
Sondaı-aq Bıýro otyrysynda Parlament Májilisinen kelip túsken zańdar jumys úshin Senattyń turaqty komıtetterine bólinip berildi.
