Q.Sátbaev atyndaǵy Qazaq ulttyq tehnıkalyq zertteý ýnıversıtetinde ótken jańa eńbektiń tanystyrylymyna avtor qatysty. Is-sharaǵa kelgen ǵalymdar men zııaly qaýym ókilderi, sondaı-aq Orazaq aǵanyń qaıratkerlik jolyn úlgi tutatyn talapker jastar avtorǵa kókeıdegi saýaldaryn qoıyp, jyly júzdesý rýhanı syrlasý keshine ulasty.
«Ár adamnyń ǵumyry – bir kitap. Toqsan asyp taǵylymdy ǵumyr keshtim be, taýqymetti ǵumyr keshtim be, onyń baǵasyn kitapty oqyǵan sanaly oqyrman bere jatar. Osy jasqa deıin qazaq ǵylymyna tom-tom kitaptar qostym. Eńbekterimdi el tanyp, muhıt asyp, sheteldiń jastaryna da paıdasy tıip jatyr. Kitaptyń arasynda ot qushyp, órtengeni de bar. Biraq ómirdiń eshqandaı qaltarys-bultarysy meni syndyra alǵan joq. Sondyqtan da alǵash ret bar ǵumyrymdy qaǵaz betine túsirip, usynyp otyrmyn», degen avtor kezekti kitapta óz ómir jolyn sýrettegen.
Qazaq etnosynyń qańqa súıekterine jarty ǵasyr boıy keshendi hám salystyrmaly zertteý júrgize otyryp, sol arqyly adamnyń qan júıesi, tis morfologııasy, maı búrmesi, tipti teri bederine deıin anyqtaýǵa bolatynyn alǵa tartyp, qazaq halqy osy ólkeni 50 ǵasyr boıy meken etkendigin ǵylymı turǵydan dáleldegen ǵalymnyń buǵan deıin shyqqan tom-tom kitaptaryna ǵylymı izdenisteri men zertteýleri arqaý bolǵan. Al bul jańa eńbektiń ereksheligi – avtor óziniń tulǵalyq qalyptasý jolyn, jan balasyna ashpaǵan syrlaryn, kóńildegi alańyn oqyrmanǵa jaıyp salady.
Sonymen qatar jańa jınaqtyń Astanadaǵy Ulttyq mýzeıde lentasy qıylyp, taǵylymdy kitap elordalyq oqyrmanǵa jol tartty. Is-sharada senator Darhan Qydyráli ǵalymnyń ónegeli joly týraly baıan etti.
– Akademık Orazaq Smaǵulov – tarıh ǵylymdarynyń doktory, professor, otandyq antropologııa ǵylymynyń atasy. Ol – Altaıdan Atyraýǵa, Alataýdan Qarataýǵa deıingi Uly dala besiginde úzdiksiz urpaq órbitip, ósip-óngen qazaq atateginiń elý ǵasyrlyq shejiresin shertken jylnamashy, qazaq halqynyń qola dáýirden búginge deıin keń-baıtaq kıeli atajurtynda kindigi berik baılanyp, násil-juraǵatyn ósirip-órbitip, el men jeriniń tamyrlastyǵy bite qaınasyp, birtutas qubylysqa aınalǵanyn álemdik ǵylymnyń qazirgi jetistikterimen órnektep aıǵaqtaǵan tarıhtyń tamyrshysy, saqtardyń sarqyty bolǵan qazaq jurty san ǵasyr sapyrylysqan halyqtardyń uly kóshine aralasyp, alty Alash atanyp, óziniń ataqonys mekeninde ejelden beri biregeı popýlıasııa túzip, tegi men túr-tulǵasy birtutas ultqa aınalǵanyn dáıektegen ǵulama ǵalym, toqsannyń tórindegi tarlanboz tarıhshy, – dedi ol.
«Asharshylyqtan aman qalǵan bala», «Máıithanadan bastalǵan mansap», «Qýǵyndaǵy ǵalym», «Ǵylym sahnasynyń syrtynda», «Táýelsizdikke jetken ǵalym», «Tiregim bolǵan otbasym» dep atalǵan alty bólimnen turatyn kitapta Qanysh Sátbaev, Álkeı Marǵulan bastaǵan halqymyzdyń birtýar uldary týraly jarqyn estelikter, avtordyń kúıinishi men súıinishin sýrettegen móltek syrlar oqyrmandy tereń oıǵa jeteleıdi. Aýyldan Almatyǵa attanǵan sát, antropologııaǵa jasalǵan alǵashqy qadamdar da baıypty baıandalǵan.
Ǵylym jolyna bar ǵumyryn arnaǵan tulǵanyń teperishi men taǵylymy mol taǵdyry týraly tereń oılaryn avtordyń óz aýzynan jazyp alǵan «AmalBooks» baspasynyń joba jetekshisi – Araıly Jaqsylyq. Kitap «Meloman» dúkenderi arqyly satylymǵa túspek.
