Ol jýrnalıst Dınara Sátjanǵa bergen suhbatynda sybaılas jemqorlyq ózekke túsken jegi qurt, aýyr dert sekildi ekenin aıtty.
«Biz dertten aıyǵý úshin dári, vaksına qoldanatynymyz sııaqty eldegi sybaılas jemqorlyqqa qarsy ımmýnıtetti kúsheıtý arqyly qutyla alamyz», deıdi A.Jumaǵalı.
Onyń pikirinshe, jemqorlyqpen kúreste qatań jaza qoldaný máseleni tolyǵymen sheshpeıdi. A.Jumaǵalı jemqorlardy qatań jazalaıtyn Qytaıdyń mysalyn keltire otyryp, ondaǵy jemqorlyq deńgeıi jaza qanshalyqty qatań bolsa da azaımaı otyrǵanyn aıtty. Sondyqtan atalǵan el bıligi túsindirý jumystaryn kúsheıtip jatqan kórinedi.
«Jemqorlardy memlekettik apparattan alastaý kerek. Bul qadrlyq másele. Adamdar qandaı ortaǵa tap bolatyny mańyzdy. Eger baqshadan jańa ákelingen qııardy tuzdalǵan qııar salynǵan ydysqa salyp qoısańyz, ol túbinde tuzdy qııarǵa aınalady. Sondyqtan bizge ortany túzeý qajet», – dedi Ashat Jumaǵalı.
